Kynbótahross á Landsmóti

Þá er stórskemmtilegu og mögnuðu dómavori að ljúka og að verða ljóst hvaða hross vinna sér inn þátttökurétt á Landsmóti. Á forsíðu WorldFengs má sjá „Sýningarskrá fyrir Landsmót 2026“ en þar kemur fram hvaða hross komast inn á Landsmót þegar yfirlitssýningum lýkur miðvikudaginn 24. júní. Ef fleiri en eitt hross eru jöfn í síðasta sæti inn á mótið (til dæmis fleiri en ein hryssa í 10. sæti í flokki 7 vetra og eldri hryssna) þá er þeim öllum heimil þátttaka á mótinu. 

Eigendur hrossa sem vinna sér inn þátttökurétt á mótinu en ætla sér ekki að mæta með þau af einhverjum ástæðum eru beðnir um að láta vita fyrir klukkan 16:00 föstudaginn 26. júní, þannig hægt sé að bjóða hrossum sem eru neðar á listanum þátttöku á mótinu. Hægt er að gera það á thorvaldur@rml.is eða í síma 866-2199.

Afkvæmasýndir stóðhestar

Lágmörk vegna afkvæmasýninga stóðhesta miðast við kynbótamat aðaleinkunnar eins og það reiknast að afloknum sýningum á Íslandi vorið 2026 og fjölda dæmdra afkvæma. Öll dæmd afkvæmi hestanna liggja til grundvallar í kynbótamatinu. Öll afkvæmi sem fylgja hestunum skulu vera dæmd í kynbótadómi. Heiðursverðlaunahestum skulu fylgja 10 afkvæmi í sýningu en 1. verðlauna hestum 6 afkvæmi.

Haft verður samband við eigendur stóðhesta sem eiga rétt á að koma með afkvæmahóp til sýninga á Landsmóti um leið og keyrslu á nýju kynbótamati verður lokið en það verður næstu helgi.

Bestu þakkir fyrir frábært samstarf í vor sýnendur og eigendur kynbótahrossa, og starfsfólk sýninga!