Kynbótasýningar vorið 2026: Skráning hefst 28. apríl

Skráning á kynbótasýningar vorsins hefst þriðjudaginn 28. apríl. Skráning fer fram í gegnum heimasíðu RML eða á forsíðu WorldFengs. Mikilvægt er að ganga frá skráningu og greiðslu tímanlega, en frestur rennur út á miðnætti auglýstra skráningardaga. Ef sýningar fyllast lokast sjálfkrafa fyrir frekari skráningar.

Frá þessu og fleiru segir í grein sem birtist á heimasíðu RML, skrifuð af Höllu Eygló Sveinsdóttur. Hér að neðan má lesa það helst sem þar kemur fram.

Breytingar á sköpulagsdómum

Ákveðnar breytingar hafa verið gerðar á tilhögun sköulagsdóma til að auka sveigjanleika:

• Valkvæður sköpulagsdómur: Hross sem eru 6 vetra og eldri, og hafa áður hlotið sköpulagsdóm 5 vetra eða eldri, þurfa ekki að mæta aftur í sköpulagsdóm. Eigendur geta látið fyrri dóm standa og mætt eingöngu í hæfileikadóm. Nýjasti sköpulagsdómur er sá sem gildir.
• Sveigjanleiki milli sýninga: Ekki er lengur krafa um að sköpulags- og hæfileikadómur fari fram á sömu sýningu. Hross getur t.d. farið í sköpulagsdóm að vori og hæfileikadóm síðar á árinu til að hljóta fullnaðardóm.
• Aldurstakmörk: Öll 4 og 5 vetra hross verða þó alltaf að fara í sköpulagsdóm áður en þau fara í hæfileikadóm.

Sýningargjöld og endurgreiðslur

• Fullnaðardómur: 46.100 kr.
• Sköpulags- eða hæfileikadómur: 35.100 kr.
• Greiðsla þarf að eiga sér stað samhliða skráningu. Endurgreiðslur vegna forfalla eru aðeins í boði ef tilkynnt er um þau fyrir kl. 16:00 síðasta virka dag fyrir upphaf sýningarviku.

Mikilvæg atriði fyrir skráningu

RML minnir eigendur á að ganga úr skugga um að öll formsatriði séu í lagi áður en skráð er:

• DNA-greining: Öll hross (hryssur, geldingar og stóðhestar) verða að vera með staðfesta DNA-greiningu í WorldFeng.
• Spattmyndir:  Úr Stóðhestum 5 vetra og eldri þarf að liggja fyrir að búið sé að taka spattmyndatöku auk blóðsýnis.
• Örmerking: Hross verða að vera örmerkt. Ef örmerki finnst ekki á sýningarstað þarf að merkja og taka DNA-sýni á kostnað eiganda.

RML áskilur sér rétt til að sameina sýningar eða fækka dögum ef lágmarksfjölda (30 hross) er ekki náð.