Ösp hlýtur Glettubikarinn

28. nóvember 2021
Fréttir

Átta hryssur hljóta heiðursverðlaun í ár

Þær hryssur sem hljóta heiðursverðlaun í ár fyrir afkvæmi eru átta talsins. Til þess að hryssa hljóti heiðursverðlaun þarf hún að uppfylla eftirfarandi skilyrði.

116 stig í kynbótamati fyrir aðaleinkunn eða aðaleinkunn án skeiðs og a.m.k. 5 dæmd afkvæmi

Efst heiðursverðlaunahryssna í ár og því Glettubikarhafi er Ösp frá Hólum sem er með 125 stig í aðaleinkunn kynbótamatsins og á sex dæmd afkvæmi. Ösp er undan Þokkabót frá Hólum og Markúsi frá Langholtsparti. Meðaleinkunn afkvæma hennar er 8,34 í aðaleinkunn. Ösp er einnig efst heiðursverðlaunahryssna fyrir kynbótamat án skeiðs en þar er hún með 125 stig.

Framtíð frá Ketilsstöðum er efst þeirra sem kemur inn í heiðursverðlaunin í gegnum aðaleinkunn án skeiðs en þar er hún með 123 stig.

Elsta hryssan á listanum er Nótt frá Oddsstöðum I sem er fædd árið 1997 og er því 24.vetra gömul í ár. Yngsta hryssan er hins vegar Rán frá Þorkelshóli 2 sem fædd er árið 2005 og er því 16 vetra gömul.

Hér fyrir neðan er listi yfir allar þær hryssur sem hljóta heiðursverðlaun í ár raðað eftir aðaleinkunn kynbótamatsins.

Nafn	Uppruni	Ae.	Ae. án skeið	Fjöldi afkvæma
Ösp	Hólum	125	125	6
Nótt	Oddsstöðum I	120	115	6
Sefja	Úlfljótsvatni	119	112	6
Sunna Rós	Úlfljótsvatni	117	118	5
Hrísla	Sauðárkróki	116	111	5
Rán	Þorkelshóli 2	114	121	5
Framtíð	Ketilsstöðum	114	123	5
Sædís	Stóra-Sandfelli 2	111	117	5