Ráslisti klár fyrir fimmganginn

26. mars 2026
Fréttir

1. deild Hringdu í hestaíþróttum er kl. 19:00 í kvöld

Fjórða keppnisgreinin í 1. deild Hringdu fer fram í nýju reiðhöllinni í Sörla í Hafnarfirði í kvöld, 26. mars. Keppni hefst stundvíslega kl. 19:00 og verður Flóra veisluþjónusta með hlaðborð eins og undanfarin keppniskvöld. Mótið er einnig í beinni útsendingu á EiðfaxaTV.

Það eru 24 knapar skráðir til leiks og eru það Helgi Þór Guðjónsson og Brekka frá Litlu-Brekku sem ríða fyrst í braut.

Spennandi keppni framundan

Af þeim knöpum sem voru í A úrslitum í fyrra er enginn af þeim skráðir til leiks svo við munum sjá nýjan sigurvegarar í ár. Á listanum er hátt dæmd hross, Íslandsmeistarar og önnur reynd pör svo þetta ætti að vera hörkukeppni í kvöld á Sörlastöðum.

Lið Fornusanda leiðir í liðakeppninni með 175 stig. Það eru þau Sigvaldi Lárus Guðmundsson á Jóni forseta frá Hesjuvöllum, Lea Schell á Húna frá Efra-Hvoli og Hlynur Guðmundsson á Neista frá Ytri-Skógum sem keppa fyrir liðið í kvöld. Sigvaldi og Lea eru á reyndum hrossum í fimmgangi en Hlynur er að mæta með Neista í sína fyrstu fimmgangskeppni en þeir hafa keppt í A flokki með góðum árangri. Lið Hrímnis er í öðru sæti í liðakeppninni með 143 stig og lið HorseDay í því þriðja með 110 stig.

Þórdís Inga Pálsdóttir leiðir í einstaklingskeppninni með 22 stig. Hún er skráð til leiks á Bjarti frá Finnastöðum sem er 11 vetra og hefur einhverja reynslu í fimmgangi en þetta er þeirra frumraun saman. Önnur er Katla Sif Snorradóttir með 20 stig og Lea Schell í því þriðja með 13,5 stig.

Það stefnir í spennandi keppni í fimmgangi í 1. deild Hringdu en fyrir þá sem eiga ekki heimangengt geta horft á mótið í beinni á EiðfaxaTV.