Ríkharður sigurvegari Equsanadeildarinnar

Áhugamannadeild Equsana og Spretts lauk í dag en síðasta greinin var gæðingaskeið og var mótið haldið í Hafnarfirði. Hægt er að sjá niðurstöður gæðingaskeiðsins HÉR

Einstaklingskeppnin var æsi spennandi í deildinni og mikið var undir fyrir síðustu greinina en mjótt var á munum milli efstu knapa. Leikar fóru þannig að Ríkharður Flemming Jensen úr liði Heimahaga varð stigahæsti knapi deildarinnar með 33 stig en hann var einnig stigahæsti knapi deildarinnar í fyrra. Katrín Sigurðardóttir endaði önnur með 30 stig og Vilborg Smáradóttir var þriðja með 28 stig.

Efstu þrír í einstaklingakeppninni í Áhugamannadeild Equsana 2022

Lið Heimahaga var stigahæsta lið deildarinnar en þetta er þriðja árið í röð sem liðið endar efst og fjórða skiptið sem liðið vinnur (2018, 2020, 2021 og 2022). Liðið náði forustu eftir fyrstu grein og hélt henni í gegnum alla mótaröðina.

Lið Heimahaga vann liðakeppnina 2022

Það er siður í Áhugamannadeildinni að velja vinsælasta knapann, þjálfara ársins og vinsælasta liðið.

Auður Stefánsdóttir í liði Vagna og þjónustu var valin vinsælasti knapinn.

Kári Steinsson var valinn þjálfari ársins en hann er þjálfari liðs Vagna og þjónustu.

Lið Kidka var valið vinsælasta liðið.