Siggi Sæm hlaut gullmerki ÍSÍ

Sigurður Sæmundsson hlaut gullmerki ÍSÍ en gullmerki ÍSÍ er veitt einstaklingum fyrir framúrskarandi störf, sjálfboðaliðastarf eða framlag til íslenskrar íþróttahreyfingar.

Sigurður Sæmundsson

Sigurður Sæmundsson á glæsilegan feril að baki bæði sem keppandi og sem landsliðseinvaldur íslenska landsliðsins í hestaíþróttum.

Sigurður var í hópi fremstu afreksknapa landsins á sínum yngri árum. Hann tók fyrst þátt fyrir hönd Íslands á Evrópumeistaramóti sem haldið var í Sviss árið 1972. Hann keppti alls á fimm Evrópu- og Heimsmeistaramótum fyrir hönd Íslands og vann þar til glæsilegra verðlauna: tvenn gullverðlaun og tvenn bronsverðlaun.

Eftir að keppnisferlinum lauk tók hann við keflinu sem landsliðseinvaldur og liðsstjóri íslenska landsliðsins til margra ára, allt til ársins 2007. Í því hlutverki stýrði hann landsliðshópnum á fjölda Heimsmeistaramóta, hélt utan um val á knöpum og hrossum og skipulagði liðið og ferðalögin út á stórmót.

Sigurður hefur hlotið bæði gullmerki LH og Heiðursverðlaun LH sem er æðsta viðurkenning sem LH veitir.