„Sigur í barnaflokki var ógleymanleg stund fyrir mig“

Tíminn flýgur! Í sumar snýr Landsmót hestamanna aftur heim að Hólum í Hjaltadal. Mörg okkar muna stemninguna árið 2016 eins og hún hefði átt sér stað í gær. Við skulum rifja upp helstu augnablikin frá því fyrir tíu árum og hita upp fyrir sumarið, við byrjum á keppni í barnaflokki.

Eyfirskur sigur í barnaflokki

Sigurvegari í barnaflokki árið 2016 var ungur Eyfirðingur, Kristján Árni Birgisson, þá tólf ára að aldri. Hann keppti á Sjéns frá Bringu (f. 2008), glæsilegum átta vetra gæðingi undan Rökkva frá Hárlaugsstöðum og Dís frá Hraunbæ.

Leið þeirra að sigrinum var spennandi. Eftir sérstaka forkeppni leiddu þeir með einkunnina 8,88, en eftir smá bakslag í milliriðlum þar sem þeir höfnuðu í 5. sæti (8,58) mættu þeir vel stemmdir í úrslitin. Þar sýndu þeir þó nokkra yfirburði og tryggðu sér gullið með einkunninni 8,95. Í öðru sæti varð Signý Sól Snorradóttir á Rafni frá Melabergi með 8,79 í einkunn og í því þriðja Júlía Kristín Pálsdóttir á Kjarval frá Blönduósi með 8,77 í einkunn.

Kristján Árni og Sjéns ríða sigurhringinn. Ljósmynd: Eiðfaxi

„Ekki týpískur barnahestur“

Við heyrðum í Kristjáni Árna og fengum hann til að rifja upp stemninguna í Hjaltadal fyrir áratug.

„Þegar ég hugsa til baka þá stendur sigurinn á Sjéns vissulega upp úr á þessu móti, ógleymanleg stund fyrir mig. Stemningin var frábær allt mótið enda alltaf gaman og gott að vera í Hjaltadal,“ segir Kristján.

Aðspurður um hvernig hestur Sjéns hafi verið, segir Kristján að hesturinn hafi verið allt annað en venjulegur. „Sjéns var einstakur, stór karakter, mikill mannþekkjari og ekki þessi týpíski barnahestur. Hann bjó yfir frábærum gangtegundum með mikið rými og fas. Hann hlustaði vel á knapann og ég held að það hafi verið gagnkvæm virðing sem gerði okkur góða saman.“ 

Verðlaunaafhending í barnaflokki á Landsmóti 2016. Lárus Ástmar Hannesson, þáverandi formaður LH stendur við hlið Kristjáns Árna. Í öðru sæti er Signý Sól Snorradóttir og í því þriðja Júlía Kristín Pálsdóttir. Ljósmynd: Eiðfaxi

Snýr aftur á Hóla í fullorðinsflokki

Mikið vatn hefur runnið til sjávar síðan árið 2016 og Kristján er í dag einn af okkar allra efnilegustu knöpum, en keppir nú í ár í fyrsta sinn í fullorðinsflokki. Hann hefur landað mörgum titlum og varð til að mynda tvöfaldur heimsmeistari á síðasta ári í 250 – og 100 metra skeiði ungmenna á Kröflu frá Syðri-Rauðalæk.

„Ég er með nokkur ný og spennandi hross sem ég hlakka til að koma fram með í keppni sem og á kynbótabrautina á þessu ári“ segir Kristján og nefnir sérstaklega tvö hross þau Súlu frá Kanastöðum og Vísi frá Ytra-Hóli. „Þá er aldrei að vita nema maður sé með eitthvað af fleiri skeiðhrossum sem geta farið nokkuð hratt.“ Það verður gaman að fylgjast með Kristjáni Árna á komandi Landsmóti og aldrei að vita nema hann geti blandað sér í toppbaráttu í einhverjum af þeim fjölmörgu greinum sem keppt er í.

Við skulum rifja augnablikið upp og heyra viðtal við Kristján Árna sem úr umfjöllunarþætti um Landsmót 2016 sem sýndur var á RÚV og er einnig að finna í Gullkistunni á EiðfaxaTV.