Söluhross sýnd í keppni-

„Hugmyndin hefur blundað lengi í mér. Eftirspurnin eftir keppnishrossum er mikil, hestar eru seldir eftir því hvaða tölur þeir eru að fá í hringvallargreinum og hugmyndafræðin bak við sölumótið byggir á að sýna söluhross þegar þeir eru í keppni,“ segir Hallgrímur Birkisson, einn aðstandenda Sölumóts sem haldið verður í Rangárhöllinni 1. október næstkomandi.

Hrossaræktendur á suðurlandi standa fyrir mótinu en þátttaka á mótinu er bundið þeim skilyrðum að keppnishrossin eiga að vera á sölu. Þrír íþróttadómarar munu dæma mótið en auk þess mun fjórði dómari lýsa því sem fyrir augu ber. „Hlutverk fjórða dómarans verður þá að útskýra afhverju hrossin fá þær tölur sem þau fá,“ segir Hallgrímur og bætir við að margir hafa lýst yfir ánægju sinni með mótið en mun þetta vera í fyrsta skipti sem tilraun verður gerð með þetta nýja form kynningar á söluhrossum.

Keppt verður í fjórgangi, fimmgangi og tölti T7, þar sem hestar sýna hægt tölt og frjálsa ferð, en ástæða þess að nota keppnisformið T7 frekar en T1 segir Hallgrímur að sé vegna þess að formið nýtist fjölbreyttum hestsgerðum. „Mikið er keppt í T7 í Evrópu og finnst mér að við þurfum að nota formið meira hér heima. Þetta er flokkur fyrir hestgerðir sem nýtast kannski ekki nógu vel í fjórgang, fimmgang eða tölt T1, t.d. geta góðir reiðhestar passað inn í þennan flokk.“

Skráning á Sölumótið er öllum opin og er skráningargjaldið er 3000 kr. á hross hvort sem hrossið tekur þátt í einni keppnisgrein eða fleiri.

Skylt er að skrá hrossið í verðflokk. Verðflokkarnir eru eftirfarandi:

0-600.000
600.000 – 1.200.000
1.200.000 – 1.800.000
1.800.000 – 3.000.000
3.000.000 +

Kynningar á hrossunum munu fara fram á ensku, þýsku og einu norðurlandamáli á meðan á þátttöku þeirra stendur.

Nánari upplýsingar um mótið veita mótshaldarar:
Ólafur Þórisson 8637130
Hallgrímur Birkisson 8642118
Vignir Siggeirsson 8943106
Steinn Máson 8939966
Davíð Jónsson 8973648