Sparta í 9,10 fyrir hæfileika

Þriðja vikan í kynbótadómum hófst í dag þegar sýningar á Rangárbökkum og Sörlastöðum hófust. Þeim til viðbótar hefst svo fyrsta sýning ársins norðanlands á morgun að Hólum. Allar eru sýningarnar í beinni útsendingu á EiðfaxaTV og geta áskrifendur sjónvarpsstöðvarinnar einnig horft á sýningarnar að þeim loknum. Mörg athyglisverð hross komu til dóms í dag á báðum þessum sýningarstöðum.

Nú í síðasta holli dagsins á Sörlastöðum komu fram tvær hryssur sem hlutu hátt í 8,80 í aðaleinkunn en það voru þær Vala frá Vindási og Sparta frá Eystra-Fróðholti en báðar eru þær sjö vetra gamlar. Vala hlaut 8,80 fyrir sköpulag þar af 9,5 fyrir samræmi. Fyrir hæfileika hlaut hún 8,78 og í aðaleinkunn 8,79 þar af 9,5 fyrir samstarfsvilja. Hún er ræktuð af Auði Stefánsdóttur sem er eigandi ásamt HARAS ehf, sýnandi er Helga Una Björnsdóttir. Vala er undan Adrían frá Garðshorni á Þelamörk og Gjöf frá Vindási.

Sparta fyrst yfir 9,00 fyrir hæfileika í ár

Spart hlaut þá hæstu hæfileikaeinkunn ársins, hingað til, þegar hún hlaut 9,10 fyrir hæfileika. Með 10,0 fyrir tölt og 9,5 fyrir brokk, greitt stökk, samstarfsvilja, fegurð í reið og hægt tölt. Hún er undan Rauðskeggi frá Kjarnholtum og Spá frá Eystra-Fróðholti ræktandi hennar er Ragnheiður Hrund Ársælsdóttir og Ársæll Jónsson sem er eigandi ásamt Önnu Fíu Finnsdóttur. Sýnandi á henni var Jón Ársæll Bergmann

Þorinn efstur á Hellu

Á sýningunni á Rangárbökkum við Hellu er efstur eftir daginn Þorinn frá Tunguhálsi II, 6.vetra gamall undan Þránni frá Flagbjarnarholti og Freyju frá Tunguhálsi II sýndur af Teiti Árnasyni. Ræktandi hans og eigandi er Líney María Hjálmarsdóttir. Hlaut hann 8,41 fyrir sköpulag og 8,48 fyrir hæfileika og í aðaleinkunn 8,46.

Sörlastaðir 1.júní 2026

Rangárbakkar 1.júní 2026