Talin þörf á tvöföldun framlaga til reiðvega

Kemur þetta fram í umsögn LH við þingsályktunartillögur um fjögurra ára og fimmtán ára samgönguáætlun. Gert er ráð fyrir 75-80 milljóna króna framlagi á ári til reiðvega í þessum tillögum. Það telja hestamenn ekki nóg og benda á að framlögin hafi staðið í stað í mörg ár og því rýrnað að verðgildi. Vakin er athygli á mikilvægi hestamennskunnar í ferðaþjónustunni og gjaldeyrisöflun.

„Hestamennska og hestatengd ferðaþjónusta er að skapa þjóðarbúinu tuga milljarða kr. í tekjur á ársgrundvelli og því nauðsynlegt að hlúa að greininni eins og kostur er,“ segir þar.

Mikilvægt sé að aðskilja sem mest umferð hesta og vélknúinna ökutækja af öryggisástæðum, ekki aðeins fyrir hestamenn heldur alla vegfarendur. Til að svo megi verða þurfi aukið fjármagn í málaflokkinn. Sjálfboðin vinna á móti fjármunum Bent er á að reiðvegir hafi í gegnum árin verið byggðir upp að verulegu leyti með frjálsu vinnuframlagi hestamanna sjálfra auk framlaga frá ríki og sveitarfélögum. Talað er um uppbygginguna sem krónu á móti krónu verkefni og lýsa hestamenn sig reiðubúna að bæta enn frekar í, á móti auknum framlögum hins opinbera.

„Hestamenn telja ekki rétt gefið þegar kemur að framlögum hins opinbera til almennra stíga, þ.e. reið-, hjóla- og göngustíga sem flokkaðir eru svo í vegalögum. Reiðstígar hafa orðið hér útundan og þarf að tvöfalda framlög til þeirra hið minnsta frá því sem nú er,“ segir í umsögn LH.

Grein þessi birtist í Morgunblaðinu í dag 7. janúar 2020