„Þetta er aldrei auðvelt val“

2. nóvember 2020
Fréttir

Sigurbjörn Bárðarson var ráðinn í starf landsliðsþjálfara í janúar árið 2018. Í febrúar árið 2019 var starfinu breytt á þann hátt að landsliðshópur LH varð virkur allt árið um kring og þannig auka tækifærið til að sinna betur markvissu afreksstarfi í hestaíþróttum þar sem áhersla er lögð á knapann sem íþróttamann. Þetta er í þriðja skiptið sem Sigurbjörn tilkynnir um landsliðshóp á þennan hátt en auk þess hefur hann valið endanlegan hóp fyrir Norðurlandamótið í Svíþjóð árið 2018 og Heimsmeistaramótið í Berlín árið 2019.

,,Þetta er aldrei auðvelt val, en það sem gerir þetta kannski aðeins auðveldara er að það er miklu meiri eftirfylgni með knöpum en áður var og maður fylgist náið með öllu því sem gerist.“ Segir Sigurbjörn þegar hann er spurður að því hvort valið verði auðveldara með hverju árinu. ,,Þessi breyting sem var gerð á landsliðsmálum árið 2019 gefur okkur því tækifæri á að vera ennþá meðvitaðari um landsliðsvalið en áður þegar þetta var eitt úrtökumót. Þá gat það orðið aðeins tilviljanakennt hverjir komust í landsliðið en núna ber maður ábyrgð á því að velja þá í landsliðið sem maður telur líklegasta til góðra verka fyrir land og þjóð á hverju stórmóti fyrir sig.“ En er ekki erfitt að velja í þennan hóp í þeirri knapaflóru sem nú er hér á landi. ,,Það er miserfitt sum yfirburðarpör eru þannig séð sjálfvalin í landsliðið en þegar þetta er orðið spurning um 2-3 knapa sem koma til greina með svipaðan styrklega þá verður það flóknara.“

Landsliðshópurinn sem tilkynntur var í janúar á þessu ári en á honum hafa orðið breytingar

Í upphafi þessa árs var tilkynnt um landsliðsval og var þá stefnan sett á Norðurlandamót sem fara átti fram síðastliðið sumar en var aflýst eins og flestum öðrum stórmótum. Setti þetta strik í reikninginn? ,,Já það gerði það að vissu leyti. NM er ákveðinn gluggi til þess að fá að kynnast kannski fleiri knöpum en fara á HM og þá eins sjá hvernig hestakostur annarra landa er.“

Nú er hestaheimurinn ekki stór og allir þekkja alla, finnurður fyrir þeirri pressu sem fylgir því að vera landsliðsþjálfari? ,,Já ég geri það. Það er mikið af metnaðarfullum knöpum sem ætla sér að vera með í liðinu en komast svo kannski ekki í þennan endanlega 7 manna hóp sem fer á HM. Þá finnur maður vel fyrir því að maður er ekki á vinsældarlistum hjá þeim knöpum. En það er hluti af þessu starfi sem ég vissi að biði mín þegar ég tók við því og þá verður maður bara að þola það.“

Sigurbjörn Bárðarson landsliðsþjálfari í hestaíþróttum

Hefur Sigurbjörn fundið fyrir auknum metnaði knapa nú þegar landsliðið er skipað allan ársins hring? ,,Já ég tel það alveg hiklaust vera þannig. Ég er í persónulegu sambandi við landsliðsknapanna allt árið um kring. Þessi breyting skerpti klárlega línurnar og ég tel þetta vera orðið mun aðgengilegra og opnara en það var og það tel ég framför.“

Eins og áður segir tilkynnti Sigurbjörn um landsliðsval nú fyrir helgi og er landsliðshópurinn skipaður svo í starfrófsröð.

Ríkjandi heimsmeistarar og titilverjendur

Benjamín Sandur Ingólfsson, Fáki

Guðmundur Björgvinsson, Geysi

Jóhann Skúlason, Fáki

Konráð Valur Sveinsson, Fáki

Teitur Árnason, Fáki

Aðrir landsliðsknapar 2021

Aðalheiður Anna Guðjónsdóttir, Herði

Árni Björn Pálsson, Fáki

Bergþór Eggertsson, Þýskalandi

Daníel Gunnarsson, Sleipni