Tveggja milljarða króna stuðningur ríkisins við málefni íslenska hestsins

30. september 2011
Fréttir

Í úttekt sem nýlega kom út á vegum Mennta- og menningarmálaráðuneyti og Sjávarútvegs- og landbúnaðarráðuneyti um stuðning ríkisins og umgjörð stjórnsýslu tengdri íslenska hestinum kemur í ljós að framlög ríkisins til málefna íslenska hestsins hafa verið rúmir 2 milljarðar króna á tímabilinu 2005-2010. Stuðningur ríkisins snýst að langmestu leyti um framlög til menntunar og rannsókna og styrkir til bættrar aðstöðu þ.e. fyrir reiðhallir, mótsstaði og reiðvegi.

Stærsta framlagið til menntamála

Tæpur helmingur upphæðarinnar, 926.741.000 kr., eru framlög ríkisins til menntunar, fræðslu og rannsókna, þar sem Háskólinn á Hólum fær drjúgan skerf, 702.617.000 kr. Framlög til ræktunar, aðstöðu og viðskipta námu tæpum 872 milljónum kr. á þessum fimm árum. Þar af hefur Innanríkisráðuneytið lagt 354 milljónir í reiðvegi. Þá hafa 320.490.000 kr. farið í reiðhallir og 74.665.000 kr. í tamningaaðstöðu. Framlög til íþrótta- og tómstundamála voru tæpar 219 milljónir kr. Þar af hefur Landsmót verið styrkt um 157.500.000 kr. og LH fengið 34.857.000 kr.

Árið 2010 námu fjárframlög ríkisins við málefni tengd íslenska hestinum samtals 405 m.kr. Um helmingur framlaga ríkisins árið 2010 fóru til menntunar og rannsókna tengdum íslenska hestinum, eða samtals 206 m.kr. Sama ár fóru 177 m.kr. til ræktunar og aðstöðu, svo sem reiðhalla og reiðvega, en 22 m.kr. til íþrótta- og tómstundarstarfsemi tengdri íslenska hestinum.

Standa þarf vörð um forystuhlutverk

Úttektin leiðir í ljós að hagsmunir af starfsemi í kringum íslenska hestinn liggja víða og eru hagrænir og viðskiptalegir hagsmunir umtalsverðir. Þá er ítarleg umfjöllun um helstu stofnanir og verkefni sem mynda heildarkerfi hestamennskunnar hér á landi auk þess sem fjallað er um íslenska hestinn í alþjóðlegu samhengi.

Í skýrslunni er farið yfir viðarmikla og nokkuð flókna stjórnsýslu tengdri íslenska hestinum. Hvatt til umræðu og stefnumótunar utan um málefni íslenska hestsins til að tryggja hagsmuni hans til framtíðar og t.d. er bent á mikilvægi þess að standa vörð um forystuhlutverk Íslands á alþjóðavísu. Varpað er fram mörgum umhugsunarefnum er varða framtíðarumgjörð hrossaræktar og hestamennsku á Íslandi og hvetja skýrsluhöfundar að umræða fari fram meðal hagsmunaaðila Íslenska hestsins.

Í niðurstöðum setja skýrsluhöfundar fram nokkur atriði sem þeir telja blasa við:

1. Að mynda sterkt sameiginlegt afl í félagslegri umgjörð, þar sem samstaða ríkir um meginmarkmið og málflutning gagnvart samstarfsaðilum erlendis

2. Að einfalda sem mest má verða stjórnsýsluumgjörð og móta sameiginlega opinbera stefnu um þróun mála.

3. Að tryggja að fjármunir og aðstaða á vegum hins opinbera nýtist sem allra best til þess að skapa sterka umgjörð um þekkingu, rannsóknir ræktun og iðkun.

4. Að standa vörð um forystuhlutverk Íslands og almenna stöðu sem upprunaland íslenska hestsins og nýta tækifæri sem því tengjast s.s. uppbyggingu þekkingar, rannsókna og almennrar verðmætasköpunar.

Úttektina vann Bjarni Snæbjörn Jónsson en að verkefninu komu Karitas H. Gunnarsdóttir, Kristinn Hugason, Óskar Þór Ármannsson auk þess sem Hellen Gunnarsdóttir, Jenný Bára Jensdóttir, Guðmundur Björn Eyþórsson og Helgi Helgason unnu að vinnslu fjárhagslegra upplýsinga. Skýrsluna má nálgast hér.