Vill að heiðursverðlaun byggist á staðfestum ræktunarárangri

Umræða um heiðursverðlaun fyrir afkvæmi heldur áfram í kjölfar umfjöllunar Eiðfaxa um Fantasíu frá Breiðstöðum, sem uppfyllir árangursskilyrði verðlaunanna en getur ekki hlotið þau þar sem hún er fallin.

Í pistli sem Olil Amble birti á Facebook-síðu Gangmyllunnar fjallar hún um fyrirkomulag heiðursverðlauna fyrir afkvæmi og mikilvægi þess að greina á milli viðurkenningar fyrir staðfestan ræktunarárangur og verðlauna sem veitt eru á viðburðum.

Viðurkenning fyrir staðfestan ræktunarárangur

Heiðursverðlaun fyrir afkvæmi eiga að heiðra framúrskarandi ræktunarhross og ræktunarstarf að mati Olil. Þau séu jafnframt gæðastimpill á hrossið, viðurkenning fyrir ræktandann og mikilvægar upplýsingar fyrir aðra ræktendur.

Í pistlinum er rifjað upp hvernig fyrirkomulag verðlaunanna hefur breyst í gegnum tíðina. Áður þurftu hross að mæta með afkvæmum sínum á Landsmót en síðar var horfið frá því fyrirkomulagi, meðal annars vegna kostnaðar og fyrirhafnar við flutning hryssna og afkvæma þeirra. Nú eru verðlaunin afhent að hausti og byggja dómsorð á þeim upplýsingum sem liggja fyrir um hrossin.

Að mati Olil er eðlilegt að hross þurfi að vera á lífi og staðsett hér á landi þegar þeim er raðað í sæti á Landsmóti eða á haustráðstefnu fagráðs. Þar sé meðal annars verið að kynna hross sem enn eru í notkun og standa ræktendum til boða.

Öðru máli gegni hins vegar um heiðursverðlaun fyrir afkvæmi, enda sé þar verið að viðurkenna ræktunarárangur sem þegar hefur náðst. Hún telur því að hross sem fallið hafa frá eigi einnig að geta hlotið slíka viðurkenningu og að árangur þeirra sé skráður og kynntur.

Telur tímabært að endurskoða reglurnar

Í pistlinum hjá Olil er vísað til sögu Fantasíu frá Breiðstöðum og lýst skilningi á vonbrigðum eiganda hryssunnar yfir því að hún geti ekki hlotið heiðursverðlaun þrátt fyrir að uppfylla árangursskilyrðin.

Jafnframt er bent á að þetta sé ekki einsdæmi og að fleiri hross hafi farið á mis við viðurkenninguna vegna þess að þau voru fallin frá áður en verðlaunin voru afhent.

Olil fagnar ummælum Þorvaldar Kristjánssonar hrossaræktarráðunautar  í samtali við Eiðfaxa. En þar sagði hann að það komi til greina að endurskoða reglurnar með það að markmiði að viðurkenna staðfestan ræktunarárangur í WorldFeng, óháð því hvort hross séu enn á lífi.

Þótt hún segist skilja hvernig núverandi fyrirkomulag varð til telur hún tímabært að endurskoða það.

Lesa má greinina í heild sinni á facebook síðu Gangmyllunnar með því að smella hér.