Rúrik hæst dæmdur á Sörlastöðum

Nóg er um að vera í dómum kynbótahrossa um allt land. Á sýningu á Sörlastöðum sem lauk með yfirliti í gær komu fram 87 hross og hlutu 72 þeirra fullnaðardóm. Dómarar voru Jón Vilmundarson, Elsa Mandal Hreggviðsdóttir og Sveinn Ragnarsson.

Hæst dæmda hrossið á þessari sýningu var Rúrik frá Halakoti en hann hlaut í aðaleinkunn 8,69 með 8,36 fyrir sköpulag og 8,86 fyrir hæfileika sýndur af Viðari Ingólfssyni. Rúrik er 9.vetra gamall ræktaður af Svanhvíti Kristjánsdóttur en í eigu Mariu Henningsson. Faðir Rúriks er Thór-Steinn frá Kjartansstöðum og móðir er Álfarún frá Halakoti.

Hæst dæmdu 5.vetra hryssurnar

Þá voru þar sýndar þær tvær 5.vetra hryssur sem hæstan dóm hafa hlotið í ár hingað til. Eru þær Rögn frá Feti og Glíma frá Grund II.

Rögn er undan Þránni frá Flagbjarnarholti og Sigyn frá Feti. Ræktandi er Fet ehf en eigandi er Bylgja Gauksdóttir sem einnig er sýnandi hennar. Hlaut hún fyrir sköpulag 8,31 og fyrir hæfileika 8,76 í aðaleinkunn 8,60. Hlaut hún m.a. 9,5 fyrir skeið og samstarfsvilja.

Glíma er undan Glúmi frá Dallandi og Grund frá Grund II. Ræktandi er Örn Stefánsson sem jafnframt er eigandi ásamt Ólöfu Stefánsdóttir, sýnandi er Daníel Jónsson. Hlaut Glíma 8,54 fyrir sköpulag, 8,56 fyrir hæfileika og í aðaleinkunn 8,55.