Fimm hryssur í um og yfir 9 fyrir hæfileika

Kynbótasýningu sem fram fór á Rangárbökkum lauk í gær með yfirlitssýningu. Þar mættu til dóms 116 hross 103 hlutu fullnaðaróm og 13 voru einungis dæmd fyrir sköpulag. Dómarar sýningarinnar voru Guðlaugur Antonsson, Guðbjörn Tryggvason og Heiðrún Sigurðardóttir.

Líkt og allar

Það væri að bera í bakkafullan lækinn að segja frá öllum þeim hátt dæmdu hrossum sem fram komu á þessari sýningu en minnt er á að allar kynbótasýningar hér á landi eru sýndar beint á EiðfaxaTV.  Þar sem áskrifendur geta einnig horft á þær hvenær sem þeim hentar.

Fimm hryssur í um og yfir 9 fyrir hæfileika

Hæst dæmda hross sýningarinnar var Blíða frá Bergi, sem hlaut í aðaleinkunn 9,02 og er það hæsta aðaleinkunn sem hryssa hefur hlotið. Blíða er 7.vetra gömul undan Skýr frá Skálakot og Rót frá Bergi. Ræktendur eru Anna Dóra Markúsdóttir og Jón Bjarnin Þorvarðarson en Þorgeir sýndi Blíðu. Áður hafði verið sagt frá Blíðu á Eiðfaxa og má lesa þá frétt með því að smella hér

Þá varð á þessari sömu sýningu Brynja frá Nýjabæ hæst dæmda hryssa allra tíma fyrir reiðhestskosti með 9,35 fyrir hæfileika. Hlaut hún fyrir sköpulag 8,19 og í aðaleinkunn 8,94. Hún er undan Gljátoppi frá Miðhrauni og Gunnrúnu frá Bæ 2. Sýnandi var Brynja Kristinsdóttir en hún er eigandi ásamt Flosa Ólafssyni, Kristjáni Fjeldsteð og Heiðu Dís Fjeldsteð, sem jafnframt er ræktandi. Brynja er 6.vetra gömul og hér má lesa nánar um dóminn á henni en hún hlaut m.a. 10,0 fyrir samstarfsvilja.

Seytla frá Íbishóli er 7.vetra gömul undan Óskasteini frá íbishóli og Seylu frá Efra-Langholti. Ræktandi er Íbishóll ehf en eigendur eru Jón Ársæll Bergmann og Ágúst Rúnarsson, það var jafnframt Jón sem sýndi Seytlu. Seytla hlaut 8,31 fyrir sköpulag og 9,22 fyrir hæfileika og fékk í aðaleinkunn 8,90. Hlaut hún m.a. 10 fyrir hægt tölt og samstarfsvilja og 9,5 fyrir tölt, brokk, skeið og fegurð í reið. Hefur enginn hryssa náð því merkilega afreki áður að vera með 9,5 eða hærra fyrir tölt, brokk og skeið.

Ramóna frá Heljdardal er 7.vetra gömul undan Draupni frá Stuðlum og Auði frá Hofi. Ræktendur hennar eru Anton Páll Níelsson og Inga María S. Jónínudóttir. En eigendur eru Nökkvi Þeyr Þórisson, Þorri Már Þórisson og Teitur Árnason sem sýndi hryssuna. Ramóna hlaut fyrir sköpulag. 8,57, fyrir hæfileika 8,98 og í aðaleinkunn 8,84. Þar af 10 fyrir skeið og 9,5 fyrir samstarfsvilja.

Alda frá Sumarliðabæ II er 6.vetra gömul undan Álfarni frá Syðri-Gegnishólum og Bylgju frá Einhamri 2. Ræktendur eru Birgir Már Ragnarsson og Silja Hrund Júlíusdóttir en eigandi er Svarthöfði-Hrossarækt ehf. Alda hlaut 8,16 fyrir sköpulag og 9,15 fyrir hæfileika og í aðaleinkunn 8,81. Hlaut hún m.a. 9,5 fyrir samstarfsvilja, fegurð í reið og fet. Sýnandi hennar var Teitur Árnason.

Hrammur hlaut 10 fyrir tölt

Áður hafa verið nefndar þær tíur sem hryssurnar nefndar hér að ofan hlutu en úrvalseinkunninn 10,0 var gefinn fyrir nokkra eiginleika á þessari sýningu.

Hrammur frá Brautarholti hlaut einkunnina 10,0 fyrir tölt og 9,5 fyrir hægt tölt, samstarfsvilja og fegurð í reið. Hann er 6.vetra gamall undan Veigari frá Skipaskaga og Örðu frá Brautarholti. Eigandi og ræktandi er Snorri Kristjánsson en sýnandi var Daníel Jónsson.