Opið íþróttamót Freyfaxa

Opið íþróttamót Hestamannafélagsins Freyfaxa fór fram um helgina á Iðavöllum. Eiðfaxi hafði samband við Brynju Rut Borgarsdóttir, sem situr í stjórn félagsins, og spurði hana út í tildrög og framkvæmd mótsins.

„Okkur í stjórn Freyfaxa datt í hug í vor að halda opið löglegt íþróttamót á Austurlandi í von um að fólk myndi taka vel í hugmyndina, skráning yrði góð og að þetta gæti orðið árlegur viðburður hér. Við höfðum ekki hitt neinn á svæðinu sem gat staðfest hvenær síðasta löglega íþróttamótið var haldið þannig að það var ekkert annað í stöðunni en að kýla á það og sjá hvernig það færi. Vissulega vorum við hikandi þegar covid fór aftur af stað af fullum krafti núna nýlega en tókum ákvörðun um að halda mótið þar sem við erum aldrei vön því að ná fólksfjölda nálægt 100 manns, gátum haldið 2 metra reglunni auðveldlega á okkar stóra félagssvæði og með frábærum jákvæðum dómurum sem bæði dæmdu og rituðu á sama tíma tókst okkur þetta.

Skráning hefði vissulega mátt vera betri en það má með sanni segja að allir þeir sem mættu voru jákvæðir og ánægðir með framlagið. Við keyrðum mótið á einum degi – fyrst forkeppni og svo úrslit allt í sömu röð.“

 Á mótinu var keppt í þremur töltgreinum (T3,T7 og T8), tveimur fjórgangsgreinum (V2 og V5) og í fimmgangi F2.

Hans Kjerúlf og Teningur frá Víðivöllum fremri sigruðu keppni í fimmgangi með 6,21 í einkunn. Í tölti T3 1.flokki var það Eiríkur Bjarnason á Mána frá Eskifirði sem stóð efstur að loknum úrslitum með 6,17 í einkunn í sömu grein í 2.flokki var það Melanie Hallbach á Haföldu frá Gunnarsstöðum sem stóð efst með 5,47 í einkunn en þær stóðu einnig efsta í fjórgangi (V5) með 6,12 í einkunn.

Ingibjörg Þórarinsdóttir sigraði keppni í T7 2.flokki á Skálmöld frá Rútsstöðum með 6,00 í einkunn. Ásgeir Máni Ragnarsson sigraði keppni í Tölti T8 barna á Flygli frá Bakkagerði með 5,58 í einkunn en hann sigraði einnig í fjórgangi (V5) barna á Bassa frá Skriðufelli.

Í fjórgangi 1.flokki var það Anja Karina Susanna Siipola sem sigraði með 6,10 í einkunn á hestinum Styrmi frá Hveragerði. Arney Ólöf Arnardóttir var eini keppandinn í ungmennaflokki í þessari grein og fór heim með gullið.