Allir íslensku knaparnir í úrslit

Alls tóku 12 knapar þátt í fimmgangi F1 í ungmennaflokki þar af voru þrír knapar sem kepptu fyrir hönd Íslands.

Hulda María Sveinbjörnsdóttir var önnur í rásröð. Hún keppti á hryssunni Hetju frá Árbæ sem er undan Sjóði frá Kirkjubæ og Hrefnu frá Árbæ. Einkunn Huldu var 6,37.

Védís Huld Sigurðardóttir var fimmta í rásröðinni. Hún keppir á stóðhestinum Búa frá Húsavík sem er undan Hróðri frá Refsstöðum og Dúsu frá Húsavík. Einkunn þeirra var 5,87 en hún hlaut mjög misjafnar einkunnir frá dómurum og voru þeir ekki sammála um framkvæmd hennar á skeiðsýningu þar sem hún fékk frá 1,5 upp í 7,0.

Matthías Sigurðsson var sjötti í rásröðinni. Hann keppir á stóðhestinum Páfa frá Kjarri sem er undan Tinna frá Kjarri og Nunnu frá Bræðratungu. Einkunn þeirra var 6,37.

Allir knapar íslands unnu sér því þátttökurétt í úrslitum en Védís Huld mætir til B-úrslita annað kvöld en þau Hulda María og Matthías í A-úrslit á sunnudaginn.

Efst að lokinni forkeppni er Tekla Petersson á Vatnadís från Noastallet með einkunnina 6,97, hún keppir fyrir hönd Svíþjóðar.