Hrikalegur efstur á kynbótasýningu í Mandelbachtal

Í síðustu viku fór fram kynbótasýning í Mandelbachtal í Þýskalandi þar sem 13 hross voru sýnd og þar af 12 í fullnaðardómi. Dómarar á sýningunni voru þau Jhon Siiger Hansen og Silke Feuchthofen.

Hæst dæmda hross sýnigarinnar var stóðhesturinn Hrikalegur frá Upphafi sem er sjö vetra gamall leirljós blesóttur að lit undan Hrannari frá Flugumýri II og Prinsessu frá Blönduósi, ræktendur hans eru þau Helga Una Björnsdóttir og Hjálmar Þór Aadnegard. Sýnandi hans var Isabelle Füchtenschnieder.  Hann hlaut 8,11 fyrir sköpulag og þar af 9,0 fyrir samræmi fyrir hæfileika hlaut hann 7,96 og í aðaleinkunn 8,02.

Isabelle og Hrikalegur. Ljósmynd: Neddens Tierfoto

Isabelle Füchtenschnieder sýndi líka næst hæst dæmda hrossið en það var 6.vetra gamall stóðhestur, Patrekur frá Holtsmúla 1 undan Stormi frá Leirulæk og Páskalilju frá Þorlákshöfn ræktaður af Þóru Bjarnadóttur og Úrvalshestum.

Hér fyrir neðan má sjá hross dæmd á sýningunni, ein sýning er áætluð til viðbótar í Þýskalandi en hún fer fram dagana 26.-29. ágúst.