Allt getur gerst á skeiðmóti Meistaradeildar Líflands

Keppni í gæðingaskeiði og 150 metra skeiði í Meistaradeild Líflands fer fram á Brávöllum á Selfossi á morgun, laugardaginn 21.mars, og hefst mótið klukkan 13:00.

Dýrmæt stig eru í boði í einstaklings- og liðakeppni og hafa skeiðgreinar oft sett strik í reikninginn í Meistaradeild Líflands og skorið úr um það hvaða knapi og lið standa uppi sem sigurvegarar að öllum mótum loknum. Þó að hestaíþróttir sé nákvæmni íþrótta og lítið megi klikka í sterkri keppni að þá er Gæðingaskeið sú grein sem einna erfiðust er, því þar má ekkert klikka í þeim tveimur skeið sprettum sem knapar hafa til umráða. Þannig geta oft óvæntir hlutir gerst í þessari grein og skammt er á milli þess að sigra og vera í einu af neðstu sætunum. Þá er 150 metra skeið einnig tæknilega flókin grein þar sem reynir á nákvæmni og tækni knapa og flýti hrossa á skeiði. Fari eitthvað úrskeiðis í startinu hjá knapa og hesti að þá eru dýrmæt sekúndubrot fljót að tapast.

Ráslistinn í þessum greinum hefur veri kunngjörður og þar má sjá marga af flinkustu knöpum og hestum á skeiði í heiminum. Það verður því bæði spennandi og fróðlegt að fylgjast með keppninni á Laugardaginn. Allt verður að sjálfsögðu sýnt í beinni á EiðfaxaTV

Staðan í liðakeppni

Lið Hjarðartúns er ennþá með töluvert forskot á toppnum eftir sterka byrjun á keppnistímabilinu en þau hafa nú 162 stig. Top Reiter/Sumarliðabær er í öðru sæti með 126 stig og í því þriðja er Hrímnir/Hest.is með 109 stig.

Efstu 10 knapar í einstaklingskeppni

Ásmundur Ernir Snorrason leiðir í einstaklingskeppninni með 33,5 stig í öðru sæti er Aðalheiður Anna Guðjónsdóttir með 30 stig. Í þriðja sætinu er svo Jakob Svavar Sigurðsson með 29 stig.