Rut hæst dæmd á Miðsumarssýningu á Rangárbökkum

Miðsumarssýningu á Rangárbökkum við Hellu lauk í dag með yfirlitssýningu, sýnt var frá viðburðinum á EiðfaxaTV. Alls voru sýnd 58 hross á sýningunni og þar af 50 þeirra í fullnaðardómi. Dómarar voru þau Guðbjörn Tryggvason, Heiðrún Sigurðardóttir og Sveinn Ragnarsson.

Næstu kynbótasýningar eru fyrirhugaðar um miðjan ágúst þegar sýnt verður í tvær vikur á Hellu og eina viku á Hólum í Hjaltadal.

Hæst dæmda hross sýningarinnar er Rut frá Valhöll, sex vetra gömul undan Viðari frá Skör og Emblu frá Valhöll, ræktendur og eigendur eru Óðinn Örn Jóhannsson og Laufey Ósk Christensen en sýnandi var Daníel Jónsson. Rut hlaut á vorsýningu 8,46 fyrir sköpulag og hlaut nú 8,64 fyrir hæfileika þar sem hæst ber einkunnin 9,5 fyrir skeið og 9,0 fyrir brokk og samstarfsvilja, aðaleinkunn Rutar er 8,58.

Af öðrum hátt dæmdum hrossum á sýningunni má nefna hryssuna Lottu frá Hafsteinsstöðum sem er átta vetra gömul undan Glúmi frá Dallandi og Linsu frá Hafsteinsstöðum. Ræktandi hennar er Þorgeir Baldursson sem er eigandi ásamt Eygló Hildi Ásgeirsdóttur en hún hlaut 8,52 í aðaleinkunn sýnd af Benjamín Sandi Ingólfssyni. Svörður frá Vöðlum hlaut flottan klárhesta dóm með 8,36 í aðaleinkunn sýndur af Herdísi Björgu Jóhannsdóttur.

Þá hlaut stóðhesturinn Hvirfill frá Mánaskál hörkudóm með m.a 9,5 fyrir skeið, sýndur af Sigurði Vigni Matthíassyni og Kasper frá Laugavöllum sýndur af Hafþóri Hreiðari Birgissyni hlaut einkunnina 9,5 fyrir greitt stökk.

Hross dæmd á sýningunni raðað eftir aðaleinkunn