Kynbótamat hrossa haustið 2026

Nú hefur nýtt kynbótamat verið vistað í WorldFeng en öllum kynbótasýningum lauk í fyrstu viku september. Vorið 2025 var ákveðið að byggja kynbótamatið bæði á kynbótadómum hrossa og einnig á keppnisárangri í ákveðnum keppnisgreinum.

Hér er um að ræða töltgreinar (T1, T3, T2 og T4), fjórgangsgreinar (V1, V2 og B-flokki), fimmgangsgreinar (F1, F2 og A- flokki) og skeiðgreinar (250 metra skeiði, 100 metra skeiði og gæðingaskeiði).
Keppnisárangur hrossa á alþjóðlegum mótum (e. World ranking) í fullorðinsflokki (meistaraflokki og 1.flokki), stórmótum í gæðingakeppni auk skeiðgreina er nýttur.

Alls voru felldir 2.488 kynbótadómar í ár í átta löndum og þá bættust við um 16.000 keppnisdómar í ár.
Þau gögn sem kynbótamatið byggir á eru því rúmlega 40 þúsund kynbótadómar og keppnisgögnin telja rúmlega 200 þúsund dóma. Það er því ljóst að grunnur kynbótamatsins er afar öflugur.

Valparanaforritið verður einnig uppfært fljótlega. Það er afar magnað verkfæri sem ræktendur hafa til að hjálpa sér að velja stóðhesta á sínar hryssur. Þar er til dæmis hægt að fylgjast með skyldleika væntanlegra foreldra og passa að afkvæmið verði ekki of skyldleikaræktað. Það gefur manni einnig kynbótamatsspá fyrir væntanlegt afkvæmi og líkur á öllum mögulegum litum.

Þetta er því afar verðmætt og skemmtilegt verkfæri sem vert er fyrir alla ræktendur að kynna sér.