Blæja jafnar einkunn Markúsar

Blæja frá Lýtingsstöðum hlaut 9,27 í einkunn í úrslitum í B flokki á gæðingamóti Geysis og jafnaði þar með einkunn Markúsar frá Langholtsparti frá því á LM2000. Eftir því sem næst verður komist er þetta hæsta einkunn sem gefin hefur verið í B flokki, en ábendingar um annað eru vel þegnar ([email protected])

Knapi á Blæju var eigandi hennar Sigurður Sigurðarson á Þjóðólfshaga I, en Blæja er ein af nokkrum hryssum á Þjóðólfshaga sem eru með 9,5 fyrir tölt í kynbótadómi. Hún er undan Djáknari frá Hvammi, Jarlssyni frá Búðardal, og Björgu frá Kirkjubæ, Trostansdóttur frá Kjartansstöðum.

Sigurður keppti á Blæju í tölti á LM2012 en komst ekki í A úrslit, hlaut 7,89 í B úrslitum. Í úrtöku í B flokki fyrir LM2012 hlaut hún 8,53. Það er því greinilegt að hún hefur verið í miklu stuði á Geysismótinu, enda misjafnt eftir hrossum hvort þau toppa sig snemma eða síðsumars.

Nokkur hross hafa farið yfir 9,0 í aðaleinkunn í B flokki. Þar má nefna Gamm frá Hofsstöðum á LM1974, 9,12, Hlyn frá Akureyri á LM1978, 9,16, Markús frá Langholtsparti LM2000, 9,27, Kjarkur frá Egilsstaðabæ LM2002, 9,03, Rökkvi frá Hárlaugsstöðum Fáksmót 2006 9,26. Styrkur Landsmótanna er þó meiri og einkunnir á einstökum mótum geta rokkað til.

Þess má geta að Blæja eignaðist tvö folöld í fyrra, rauðstjörnóttan hest undan Kjarna frá Þjóðólfshaga I og rauða hryssu undan Loka frá Selfossi. Hún gekk þó ekki með þau bæði, en fékk aðstoð frá annarri hryssu sem gekk með og fóstraði merfolaldið.