Styrkur til rannsóknar á hestamennsku

Á vef Hólaskóla, www.holar.is, kemur fram að á fimmtudaginn 7. janúar s.l. var undirritaður samningur á milli ferðamáladeildar Háskólans á Hólum og Vaxtarsamnings Norðurlands vestra um styrk upp á 1.500.000 króna til rannsóknar á efnahagslegu umfangi, mikilvægi og eðli hestamennsku á Norðurlandi vestra.

Húnavatnssýslur og Skagafjörður eru svæði sem þekkt eru fyrir hestamennsku en haldbærar upplýsingar um umfang og samsetningu atvinnustarfsemi í tengslum við hesta á svæðinu, sem og á landsvísu, eru mjög takmarkaðar.  Er verkefninu ætlað að bæta nokkuð úr þessum skorti.

Verkefnisstjóri er Ingibjörg Sigurðardóttir lektor en hún hefur ásamt samstarfsmönnum við ferðamáladeildina unnið að rannsóknum á hestaferðamennsku á undanförum árum.  Áformað er að Rannsóknamiðstöð Háskólans á Bifröst komi einnig að verkefninu.

– Inga / www.holar.is