Fjórðungsmót Austurlands á næsta ári

Á mótinu verður keppt í A- og B-flokki (flokki I og II), barna- , unglinga- og ungmennaflokki, tölti (T1 og T3) þar T3 er ætlað minna vönum og einnig verður keppt í kappreiðum (stökk og skeið).

„Töltgreinar og kappreiðar verða opnar á landsvísu en gæðingakeppni er eingöngu fyrir aðildarfélög mótsins en hestamannafélögum frá og með Árnessýslu norður í Eyjafjarðarsýslu er boðið að taka þátt í mótinu og má hvert félag senda ótakmarkaðan fjölda fulltrúa í gæðingakeppni I og II,“ segir í tilkynningu frá mótshöldurum.

Haldin verður kynbótasýning þar sem verður boðið upp á bæði hefðbundna braut og grasbraut sem er ein sinnar tegundar.

„Félagssvæði mótsins verður stækkað að þessu sinni en með því vilja mótshaldarar stuðla að aukinni þátttöku áhugamanna, barna og unglinga og eins fá úrval bestu gæðinga og kynbótahrossa til að taka þátt í mótinu. Frábær aðstaða er á svæðinu þar sem boðið verður upp á stíur í félagshúsi auk girðinga fyrir hross.“

Stutt er í næstu hótelgistingu en einnig verður boðið upp á tjaldstæði við félagsheimilið Mánagarð sem er einungis í eins kílómeters fjarlægð þar sem salernis- og sturtuaðstaða er til staðar.

„Einnig er stutt í næstu tjaldstæði með aðgengi að rafmagni, að Myllulæk (6 km) í frábæru umhverfi eða á Höfn (8 km). Á Höfn er að finna alla helstu þjónustu, svo sem eldsneytisstöðvar, hleðslustöðvar, sundlaug og verslun svo eitthvað sé nefnt. Fyrir hönd Hestamannafélagsins Hornfirðings vonumst við til þess að sem flestir geri sér leið austur í Hornafjörð og geri mótið að ógleymanlegri minningu með okkur.“