Hörður hlaut Æskulýðsbikar LH

Árlega veitir Landsamband Hestamannafélaga einu hestamannafélagi Æskulýðsbikar LH, en bikarinn er veittur því félagi sem skarað hefur fram úr í æskulýðsmálum.

Helga B. Helgadóttir, formaður Æskulýðsnefndar LH veitti, á Formannafundi LH í dag, Arnari Jónssyni Aspar, fulltrúa æskulýðsnefndar Harðar og Guðjóni Magnússyni formanni bikarinn fyrir fyrirmyndar æskulýðsstaf á liðnu starfsári.

Um 20 skýrslur æskulýðsnefnda bárust LH og í máli Helgu kom fram að greinilegur vöxtur og fjölbreytileiki sé í æskulýðsstarfi hestamannafélaga um allt land. Hestamannafélögin hafi verið iðin við að standa fyrir námskeiðum og reiðkennslum og fræðslu af ýmsu tagi, fjölbreyttum mótum s.s. smalamótum og þrautabrautum og bryddað upp á sniðugum nýjungum. Allar skýrslur æskulýðsnefnda sem bárust LH má nálgast hér á heimasíðu Landssambandsins.

Í máli formanns Harðar, Guðjóns Magnússonar kom fram að viðurkenningin væri honum afar hugleikinn og væri hann því afar stoltur af því að fá bikarinn til Mosfellsbæjar.