Æsispennandi töltkeppni var lokagrein dagsins á Flúðum

Keppni hélt áfram á Flúðum í dag þar sem fram fer nú opið Gæðingamót. Blaðamaður Eiðfaxa dvaldi á svæðinu í dag og fylgdist með keppni en það má með sanni segja að stemningin á meðal keppenda og áhorfenda sé góð og að þetta mót sé að skipa sér sess sem eitt af skemmtilegustu mótum ársins að minnsta kosti hér sunnan heiða.

Keppt var í forkeppni í A-flokki gæðinga, A-flokki áhugamanna og A-flokki ungmenna. Þá fór einnig fram forkeppni í B-flokki og A-úrslit í þremur töltgreinum í kvöld.

Keppni í úrslitum í tölti var spennandi í öllum flokkum. í tölti 18 ára og eldri voru í húfi 100.000 krónur sem helstu styrktaraðilar mótsins Dýralæknirinn á Flúðum. og Gröfutækni gáfu. Sætaröðun dómara þurfti til að skera úr um sigurvegara en það fór svo að Ragnhildur Haraldsdóttir og Úlfur frá Mosfellsbæ fóru heim með verðlaunaféð.

Hulda María Sveinbjörnsdóttir sigraði keppni í tölti 17 ára og yngri á Garpi frá Skúfslæk og Sölvi Þór Oddrúnarson vann tölt T7 barna á Leik frá Mosfellsbæ.

Úrslitaknapar í Tölti T7 barna

Í A-flokki gæðinga er það Katalína frá Hafnarfirði sem efst stendur en knapi hennar er Sólon Morthens, frábær jafnvíg alhliða hryssa. Í A-flokki áhugamanna er það Kraftur frá Breiðholti í Flóa sem efstur stendur og knapi hans er Hafdís Arna Sigurðardóttir.

Sólon Morthens og Katalína frá Hafnarfirði áttu góðan dag

Í B-flokki gæðinga er það Frár frá Sandhóli sem leiðir en sýnandi hans var Þór Jónsteinsson í B-flokki áhugamanna er efstur Óskar-Þór frá Hvítárholti og Guðrún Margrét Valsteinsdóttir.

Frár frá Sandhóli er efstur í B-flokki gæðinga fyrir úrslit

Óskar-Þór frá Hvítárholti er efstur í B-flokki áhugamanna

Hulda María Sveinbjörnsdóttir er efst í A-flokki ungmenna á Björk frá Barkarstöðum.

Á morgun fara fram A-úrslit í öllum flokkum gæðingakeppninnar