Frábæru íþróttamóti Sleipnis lokið

Úrslitadagur á opnu íþróttamóti Sleipnis fór fram í mikilli rigningu en knapar og starfsfólk lét það ekki á sig fá og var mikið um áhorfendur sem héldu sig í bílum sínum og fylgdust spenntir með.

Úrslit fóru fram í mörgum flokkum og var stundvísi og prúðmennska knapa til fyrirmyndar.

Í meistaraflokki sáust margar góðar sýningar og voru úrslit í flestum flokkum spennandi á að horfa. Í slaktaumatölti var það Matthías Leó Matthíasson sem stóð efstur á Doðranti frá Vakurstöðum með 7,38 í einkunn.

Teitur Árnason stóð efstur í fimmgangi meistara á Atlasi frá Hjallanesi með 7,27 í einkunn. Jakob Svavar fór mikinn í fjórgangi meistara og stóð uppi sem sigurvegari á Hálfmána frá Steinsholti með 7,73 í einkunn.

Það var svo Viðar Ingólfsson sem sigraði keppni í tölti meistara en það voru síðustu úrslit mótsins. Hann reið Maístjörnu frá Árbæjarhjáleigu snilldarlega og uppskar sigur en úrslitin voru frábær á allan hátt og eftirtektarverð hversu prúðmannlega þau voru riðin og gefa þau góð fyrirheit um keppnistímabilið sem framundan er utandyra.

Hér fyrir neðaan má sjá allar niðurstöður mótsins.