Fumlaus fágun í fjórgangi og tveir íslenskir heimsmeistaratitlar!-

Forkeppni í fjórgangi var geysilega skemmtileg áhorfs, enda mörg afar glæsileg hross skráð til leiks. Sólin skein í St. Radegund og Íslenskir áhorfendur höfðu sannarlega ástæðu til að brosa og fagna enda stóðu fulltrúar okkar sig allir afar vel.

Agnes Hekla Árnadóttir og Vignir frá Selfossi riðu á vaðið og nutu sín vel á vellinum, öll sýningin var fumlaus og skemmtileg og hlutu þau einkunnina 7,07. Röskur frá Sunnuhvoli fór einnig afar vel hjá Arnari Bjarka Sigurðarsyni sem hlaut 6,70 fyrir sína frammistöðu.

Sjarmatröllin Sigur frá Hólabaki og Hinrik Bragason voru glæsilegir og fasmiklir í sólinni eins og þeim var von og vísa, uppskáru 7,87 og mikið lof áhorfenda og eru þriðjir inn í úrslit á eftir Isabelle Felsum og Viktor frá Disa frá Danmörku og Frauke Schenzel og Tígul vom Kronshof frá Þýskalandi sem eru í tveimur efstu sætunum.

Hulda Gústafsdóttir og Kjuði frá Kirkjuferjuhjáleigu áttu góða innkomu á mótið. Sýningin þeirra var öguð og augljóslega vel æfð, allar skiptingar átakalausar og fengu þau 7,60. Þau eru í 9. Sæti og munu keppa í B-úrslitum á morgun.

Jóhann Skúlason og Hnokki frá Fellskoti sýndu kunnuglega takta, voru öruggir og taktfastir og uppskáru 7,80 og 4. sæti inn í A-úrslit.

Tveir Íslenskir heimsmeistarar

Hekla Katharína Kristinsdóttir og Gautrekur frá Torfastöðum voru upp á sitt besta í dag. Þau fóru fáguðum og dansandi skrefum um völlinn eins og þau eru þekkt fyrir og fengu 7,27 sem er hæsta einkunn sem ungmenni fékk í dag og er hún því heimsmeistari ungmenna í fjórgangi. 

Sýning Eyjólfs Þorsteinssonar og Óskar frá Þingnesi var glæsileg, fengu flotta 7,70 og eftir stórkostlegan árangur í forkeppni slaktaumatölts er ljóst að Eyjólfur er heimsmeistari í samanlögðum fjórgangsgreinum. Þeir eru í 7. sæti í fjórgangskeppninni og munu keppa með Huldu í B-úrslitum.

Glæsilegt!