Góður árangur yngri knapa í töltgreinum

Keppnisárinu á Íslandi sem og víðast annars staðar er nú lokið og allir mótshaldarar ættu að vera búnir að skila inn niðurstöðum. Þá er gaman að skoða stöðulista ársins í mismunandi greinum og það er það sem Eiðfaxi hefur verið að gera á síðustu vikum.

Nú höfum við kallað fram stöðulista í töltkeppni í yngri flokkum. Annars vegar keppni í T1 í ungmenna og unglingaflokki og hins vegar T3 í barnaflokki.

Efstur á stöðulista ársins í ungmennaflokki er Egill Már Þórsson á Össu frá Miðhúsum með einkunnina 7,77. Heimsmeistarinn í þessari grein, Herdís Björg Jóhannsdóttir og Kvarði frá Pulu, eru ekki langt undan með 7,73 í einkunn. Þriðja á listanum er svo Glódís Rún Sigurðardóttir og Drumbur frá Víðivöllum fremri með 7,70.

Í unglingaflokki var það Svandís Aitken Sævarsdóttir sem náði besta árangri ársins í T1 á Fjöður frá Hrísakoti með einkunnina 7,43. Ragnar Snær Viðarsson og Þormar frá Neðri-Hrepp hlutu 7,13 og þriðja á listanum ere Elva Rún Jónsdóttir á Straumi frá Hofsstöðum, Garðabæ með 7,10.

Apríl Björk Þórisdóttir er efst á stöðulista barna í T3 en ekki er keppt í T1 í barnaflokki. Apríl hlaut einkunnin 6,73 á Lilju frá Kvistum. Í öðru sæti á listanum er Guðrún Elín Egilsdóttir á Rökkva frá Miðhúsum með 6,50 í einkunn. Jöfn í þriðja til fjórða sæti eru þau Kristín Rut Jónsdóttir á Roða frá Margrétarhofi og Róbert Darri Edwardsson á Sömbu frá Ásmúla með einkunnina 6,43.