Hæsti hringvöllur í heimi

Nýr hringvöllur var tekinn í notkun á Tamangur hestamiðstöðinni í Colorado ríki í Bandaríkjunum á dögunum. Árlegt mót staðarins fór einnig fram og var þátttaka góð og mikil ánægja með byggingu vallarins sem bætir mjög möguleika til þjálfunar og keppni á svæðinu. Völlurinn stendur í 2300 metra hæð, sem er hærra en hæsti tindur á Íslandi, Hvannadalshnjúkur, sem er rúmlega 2100 metrar að hæð. Samkvæmt óvísindalegri könnun Eiðfaxa er þetta því líklegast sá hringvöllur sem stendur hæst í heiminum.

Nýi völlurinn á Tamangur. 

Mikil uppbygging hefur átt sér stað á Tamangur og samfélag eigenda íslenskra hesta í Colorado hefur vaxið jafnt og þétt undanfarin ár. Svæðið hentar vel til að halda íslenska hesta, víðsýnt, gott landrými og fjölbreytt landslag og má reikna með því að íslenskum hestum fjölgi enn frekar á þessum slóðum, en sögu þeirra í Colorado má rekja a.m.k. aftur til ársins 1885 þegar Jesse nokkur Harris flutti þangað 18 íslenska hesta. Þorgeir Guðlaugsson hefur rannsakað sögu íslenska hestsins í ríkinu og komist að því að hestakynið naut vinsælda og vakti athygli um langt skeið, en um 1930 hurfu þeir af sjónarsviðinu í nokkra áratugi, en áttu síðar eftir að eiga sterka endurkomu.

Ásta Dögg Bjarnadóttir-Covert vann bæði tölt og fjórgang. 

TIFE mótið gekk vel á Tamangur og var mikil ánægja með framtakið. Lengst að kom Ásta Dögg Bjarnadóttir-Covert ásamt fjölskyldu sinni, alla leið frá Californiu, og hún og hestur hennar Gígur frá Ketilsstöðum unnu bæði tölt og fjórgang í opnum flokki. Öll nánari úrslit af mótinu má nálgast í IceTest appinu.

Næst á dagskrá í mótahaldi í Bandaríkjunum er fyrsta Ameríkumótið í hestaíþróttum sem fram fer á Harmony Icelandics búgarðinum í Iowa um næstu helgi. Um WR mót er að ræða og koma þátttakendur um langan veg, sumir aka jafnvel í nokkra daga.

Jeff Rose og Coralie Denmeade eru eigendur Tamangur ásamt fleirum. Hér eru þau ásamt Laura Benson sem var með námskeið í aðdraganda mótsins.

Unga kynslóðin stóð sig vel á mótinu.