„Heita sætið“ í Eiðfaxa

Nýtt tölublað Eiðfaxa fór í prentun í gær og geta áskrifendur vænst blaðsins uppúr helginni.Í blaðinu nú er mikið efni um Heimsleikana í Austurríki en Eiðfaxi var þar og fylgdist með. Ýmislegt annað efni er í blaðinu,…

meðal annars grein sem nefnist „Heita sætið“ og fjallar hún um hin vandasömu störf dómara. Greinina skrifar Ólafur Árnason en hann er meðal annars dómari í hestaíþróttum. Hér fylgir með stuttur kafli úr greininni.
„Undirritaður hefur bæði setið í hinu funheita sæti dómara og einnig í hægindastól brekkudómarans. Ég get hiklaust sagt að starf mitt sem brekkudómari er mun þægilegra og lausara við gagnrýni en það starf sem krefst þess að ég lyfti spjöldum á loft. Einnig er mjög auðvelt að „sturta“ sýningum úr brekkunni, eða fara með þær í hæstu hæðir.
Við skulum alveg hafa það á hreinu að dómarar eru mannlegir og geta gert mistök, annað væri óeðlilegt, hinsvegar þurfa dómarar líka að vera vissir um það að þeir komi vel undirbúnir til dómstarfa“.