„Hún er vel gerð, stór og myndarleg“

Eiðfaxi heldur áfram að skoða kynbótamatið og að þessu sinni trippi á tamningaaldri, eða fædd 2018.

Þar efst á lista er Rauðhetta frá Þorlákshöfn með 128 stig í aðaleinkunn og 135 stig í aðaleinkunn án skeiðs. Rauðhetta er í eigu Svarthöfða – Hrossarækt en hún er ræktuð af Þórarni Óskarssyni. Rauðhetta var í tamningu hjá Ólafi B. Ásgeirssyni á Sumarliðabæ en Ólafur sagði í samtali við Eiðfaxa að þetta væri efnileg hryssa. „Hún er mjög efnileg og tamdist mjög vel. Hún er vel gerð, stór og myndarleg. Ég hef trú á henni, hún lagðist mjög vel í mig,“ segir Ólafur en Rauðhetta er nú í smá fríi og verður haldið áfram tamningu eftir jól.

Rauðhetta er á toppnum á báðum listum (aðaleinkunn og aðaleinkunn án skeiðs). Hún er undan Sendingu frá Þorlákshöfn en Sending sló í gegn með knapa sínum, Helgu Unu Björnsdóttur, þegar hún hlaut 10 fyrir tölt, 8,70 fyrir hæfileika, 8,55 fyrir sköpulag og 8,64 í aðaleinkunn. Sending á eitt sýnt afkvæmi, Konsertsdótturina, Hendingu frá Fákshólum en hún hlaut í sumar 8,45 í aðaleinkunn. Faðir Rauðhettu er Ísak frá Þjórsárbakka, Ísak er einkar fallegur en hann hefur hlotið 8,84 fyrir sköpulag, fyrir hæfileika 8,45 og í aðaleinkunn 8,61. Ísak á eitt sýnt afkvæmi, Ísey frá Þjórsárbakka, og hlaut hún 8,19 í aðaleinkunn.

Efstu hross á tamningaaldri samkvæmt aðaleinkunn kynbótamats og aðaleinkunn án skeiðs.