Í fótspor Wittgensteins

15. desember 2012
Fréttir

Nákvæmlega hundrað árum eftir að heimspekingurinn Ludwig Wittgenstein og David Pinsent fóru hugljómunarför á hestum um kóngsveginn á suðurlandi, endurtók hópur fólks þá sömu ferð nú í haust. Með í för var prófessorinn Ray Monk, einn virtasti fræðimaður heims á sviði heimspeki Wittgensteins.

Fararstjórar ferðarinnar, Sigurður I. Björnsson hjá Riding Iceland og Halldór Friðrik Þorsteinsson, heimspekingur rita grein um ferðina sem farin var í haust í jólablaði Eiðfaxa. Jafnframt nýta þeir sér dagbókarskrif Pinsents frá árinu 1912 til að varpa ljósi á frægðarför félaganna fyrir hundrað árum.

Pinsent segir svo í dagbók sinni 5. október 1912 í lok ferðarinnar:

„Landið var alveg nýr heimur … spennan og allt saman, allt gerði þetta ferðalagið að einni yndislegustu reynslu lífs míns. Þetta skilur eftir allt að því rómantíska dulúð í huga mér, því mesta rómantíkin felst í framandi upplifunum og framandi umhverfi, hverskyns upplifunum, svo fremi sem þær séu framandi.“