Íslenski hesturinn aðalstjarnan í Svíþjóð

Horses of Iceland hefur undanfarin þrjú ár verið í samstarfi við SIF, Svenska Islandshästförbundet, og verið með sameiginlegan kynningarbás fyrir íslenska hestinn. Í básnum var m.a. hægt að vinna flugmiða og hestaferð á Íslandi í boði Íslandshesta. Einnig voru til sýnis myndbönd af íslenska hestinum, bæklingar og kynningarefni frá samstarfsaðilum, þrívíddargleraugu þar sem hesturinn er sýndur í fallegri náttúru o.m.fl. Auk þess voru nokkur fyrirtæki/aðilar að kynna vörur og þjónustu tengdar íslenska hestinum.

Á sýningunni í ár var kynning íslenska hestsins enn meiri en áður. Haldin var töltkeppni á stóra sviðinu en aðalstyrktaraðilar keppninnar voru Horses of Iceland ásamt Uhip. Átta knapar á heimsmælikvarða tóku þátt en það voru; Jóhann R. Skúlason (IS), Katie Brumpton Sundin (FI), Gabrielle Severinsen (NO), Eyjólfur Þorsteinsson (SE), Lisa Drath (DE), Bernt Severinsen (NO), Vignir Jónasson (SE) and Anne Baslev (DK).

Svo fór að heimsmeistarinn Jóhann R. Skúlason og Finnbogi frá Minni-Reykjum stóðu uppi sem öruggir sigurvegarar með einkunnina 9.11, annar var Vignir Jónasson með 8.22 og þriðji var Eyjólfur Þorsteinsson með 7.83. Fimm alþjóðlegir dómarar dæmdu keppnina. Það var svo frú Estrid Brekkan, sendiherra Íslands í Svíþjóð, sem veitti verðlaunin. Gaman er að segja frá því að töltkeppni íslenska hestsins er eitt af fáum atriðum sýningarinnar sem er sýnt beint í sænska ríkissjónvarpinu, útsending sem nær til rúmlega milljón áhorfenda. Á stóra sviðinu sýndi íslenski hesturinn einnig munsturreið og fram komu hæst dæmdu stóðhestar Svíþjóðar í hverjum aldursflokki.

Horses of Iceland stóð einnig fyrir skemmtilegri og öðruvísi sýnikennslu sem bar heitið “A horse is a horse”. Það var Julio Borba sem kenndi tveimur knöpum, þeim Olil Amble sem reið Álffinni frá Syðri-Gegnishólum og Kerstin Dahlberg sem reið hesti af Lusitano kyni. Þær sýndu fimiæfingar á mismunandi gangtegundum og hvaða áhrif æfingarnar höfðu á hestana. Í lokin skiptu knaparnir svo um hesta og var fróðlegt að fylgjast með þeim þjálfa hestana.

Sænsku ræktunarsamtökin héldu fyrirlestur þar sem Olil Amble sat fyrir svörum SIF um hver væri lykillinn að því að rækta íslenskan gæðing. Höfðinginn Mökkur frá Varmalæk, sem er orðinn 34 vetra gamall, var til sýnis og naut mikilla vinsælla, sérstaklega hjá yngstu kynslóðinni.

Á sýningunni komu fram og eru til sýnis öll þau hestakyn sem eru í Svíþjóð. Á meðal þeirra er haldin rafræn vinsældakosning og í ár var íslenski hesturinn kjörinn vinsælasta hestakynið á sýningunni!

Mette Sattrup tók myndirnar sem fylgja fréttinnu