Kynbótadómar á Fjórðungsmóti

Fjórðungsmót á Höfn í Hornafirði hófst í dag í blíðskaparveðri. Töluvert af fólki er mætt á svæðið og stemmingin góð. Það er ljóst að mótsgestir munu eiga góða daga á Fornustekkum þessa helgina veðurspáin er mild og góð og Hornfirðingar gestrisnir og glaðlegir.

Alls voru sýnd 31 hross í dag en yfirlitssýning verður á laugardaginn.

Af þeim stóðhestum sem sýndir voru stendur efstur Skugga-Sveinn frá Þjóðólfshaga sem er sjö vetra gamall. Hann var sýndur af eiganda sínum og ræktanda Sigurði Sigurðarsyni. Skugga-Sveinn er með sköpulagsdóm upp á 8,51 og fyrir hæfileika 8,05 í aðaleinkunn 8,24. Hæst hlaut hann 9,0 fyrir tölt, brokk og fegurð í reið. Skugga-Sveinn er undan Álfi frá Selfossi og Pyttlu frá Flekkudal, sem bæði hafa hlotið heiðursverðlaun fyrir afkvæmi.

Hæst dæmda hryssan, og jafnframt hæst dæmda hrossið, sem sýnt var í dag er Fura frá Árbæjarhjáleigu II sýnandi hennar var Hekla Katharina Kristinsdóttir. Fura er með fyrir sköpulag 8,19 og hlaut hún í dag 8,35 fyrir hæfileika og í aðaleinkunn 8,28. Hlaut hún jafnan og góðan dóm og enga einkunn undir 8,0. Hún hlaut 8,5 fyrir tölt, brokk, fegurð í reið og vilja og geðslag. Fura er undan Jarli frá Árbæjarhjáleigu og Framför frá Skarði.

Af öðrum hrossum sem mikla athygli vöktu má nefna tvær fimm vetra klárhryssur þær Ísöld frá Strandarhjáleigu sýnda af Elvari Þormarssyni og Karítas frá Þjóðólfshaga sem sýnd var af Sigurði Sigurðarsyni. Hlutu þær báðar 5 sinnum einkunnina 9,0 fyrir einstaka þætti í hæfileika dómi en það var fyrir tölt,brokk, hægt tölt, fegurð í reið og vilja og geðslag.

Elvar Þormarsson sýndi fimm hross frá Strandarhjáleigu ræktuð af sér eða fjölskyldu sinni og hlutu þau öll 1.verðlaun í aðaleinkunn.

Hér fyrir neðan má sjá alla dóma dagsins.