Líklegir til fyrstu verðlauna fyrir afkvæmi
Til að stóðhestur hljóti fyrstu verðlaun fyrir afkvæmi verður hann að uppfylla tvö skilyrði; 118 stig í kynbótamati og 15 dæmd afkvæmi. Í framhaldi af því að hross hljóta nú tvær aðaleinkunnir, með og án skeiðs, eru stóðhestum sem hljóta 118 stig eða meira í aðaleinkunn kynbótamats án skeið nú líka veitt afkvæmaverðlaun. Áfram verður þó miðað við aðaleinkunn kynbótamatsins þegar hestum er raðað í verðlaunasæti á stórmótum.
Eftirfarandi hestar eru líklegir til að hljóta fyrstu verðlaun fyrir afkvæmi á Íslandi og koma fram á næsta Landsmóti með afkvæmahópum sínum. Þeim er raðað eftir aðaleinkunn kynbótamatsins eins og það stendur nú. Það er þó misjafnt hversu mörg afkvæmi þessara hesta þurfa að koma til dóms til að þeir nái lágmörkum en sumir hafa náð þeim nú þegar.
Hringur frá Gunnarsstöðum I og Hreyfill frá Vorsabæ II hafa nú þegar náð lágmörkum til fyrstu verðlaun fyrir afkvæmi og munu því fá afkvæmaorð birt í WorldFeng. Þeir verða svo verðlaunaðir á næsta Landsmóti, ef þeir standast enn kröfur til afkvæmaverðlauna.
Nafn | Uppruni | Ae. | Ae. án skeiðs | Fj. afkvæma |
Forkur | Breiðabólsstað | 125 | 119 | 6 |
Organisti | Horni I | 123 | 115 | 7 |
Knár | Ytra-Vallholti | 121 | 112 | 12 |
Dagur | Hjarðartúni | 121 | 120 | 6 |
Sólbjartur | Flekkudal | 118 | 115 | 9 |
Hringur | Gunnarsstöðum I | 115 | 122 | 19 |
Hreyfill | Vorsabæ II | 114 | 127 | 21 |
Lexus | Vatnsleysu | 112 | 118 | 7 |
Tekið skal fram að stóðhestar í öðrum löndum sem eru að nálgast eða hafa náð lágmörkum til fyrstu verðlauna fyrir afkvæmi eru ekki með á listanum. Listinn miðast við þá hesta sem gætu komið fram með afkvæmahóp á næsta Landsmóti.