Magnús Lárusson við dómstörf í Noregi

Kynbótadómarinn Magnús Lárusson dæmir nú kynbótasýningu í Tresfjord í Noregi samkvæmt Worldfeng og heimildum Eiðfaxa.  Hann sendi frá sér yfirlýsingu nýlega að hann myndi víkja til hliðar í dómstörfum vegna alvarlegra mistaka.  Að sögn Guðlaugs Antonssonar hrossaræktarráðunauts hefur hann eða Ráðgjafamiðstöð Landbúnaðarins enga lögsögu yfir störfum Magnúsar Lárussonar erlendis, það mun vera í höndum FEIF.  Ekki náðist í Magnús vegna þessa máls.

Yfirlýsing Magnúsar: Á kynbótasýningu á Selfossi nú í vikunni urðu mér á alvarleg mistök.  Lét ég orð falla sem eru algerlega óásættanleg fyrir mann í minni stöðu.  Ég biðst innilegrar afsökunar á framferði mínu.    Ég hef ávallt í mínum störfum gætt hlutleysis við dómstörf og metið hvert hross eins og það hefur komið fyrir í dómi hverju sinni.   Friður verður að ríkja um dómstörf kynbótahrossa og traust á því starfi sem þar fer fram.  Mín afglöp eru þess eðlis að því trausti er nú ógnað.   Mín persónulegu mistök mega ekki verða til þess að að kasta rýrð á það starf.  Ég mun því víkja til hliðar í dómstörfum kynbótahrossa að svo komnu máli og ítreka jafnframt afsökunarbeiðni mína til allra þeirra sem hlut eiga að máli.