„Margt spennandi framundan“

Hestamannafélagið Fákur fagnar 100 ára afmæli sínu á árinu en Eiðfaxi heyrði í framkvæmdastjóra Fáks, Einari Gíslasyni, sem sagði margt spennandi framundan. “Við vonum til þess að geta haldið þessa viðburði sem við erum með á dagskrá nú þegar framundan eru afléttingar á sóttvarnartakmörkunum. Við ætlum að gera mikið úr Degi reiðmennskunnar og stórsýningu Fáks sem verður haldin síðustu helgina í mars. Einnig er fyrirhugað að halda stóra árshátíð 23. apríl en Fákur var stofnaður 24.apríl sem er sunnudagur í ár. Árshátíðin verður á laugardegi og munum við skála á miðnætti fyrir 100 ára afmælinu,” segir Einar.

Einar segir að félagið stefni einnig að því að gefa út veglegt Fáksblað í tilefni afmælisins og stefnt er á að það komi út í mars. “Við ætlum einnig að gera meira úr þessum mótum sem við erum með t.d. verður Reykjavíkurmeistaramótið sérstaklega veglegt í ár. Við höfum alltaf lagt mikið í umgjörð mótsins og verður hún hin glæsilegasta í ár, hálfgerður Landsmóts bragur á því. Hugsanlega verða einhverjir dansleikir í tenglsum við mótið,” bætir hann við en það er greinilegt að Fáksmenn eru stórhuga fyrir komandi ári.