„Mjög sætur sigur“ – Védís Huld Íslandsmeistari í gæðingaskeiði

„Þetta er í fyrsta skipti sem ég næ í titil í gæðingaskeið og er þetta því mjög sætur sigur, sérstaklega af því þetta er svo tæknilega erfið grein. Ég náði líka loksins að láta allt heppnast á Hrafnhettu í báðum sprettum og því er þetta mjög sætur sigur.“ Segir Védís Huld Sigurðardóttir nýkrýndur Íslandsmeistari í gæðingaskeiði unglinga.

En hvers vegna er gæðingaskeið svo erfið grein að mati Védísar? „Maður þarf að hafa mikla stjórn á hrossinu sínu og geta kallað fram bæði kraft og yfirvegun. Það þarf allt að púslast saman í tveimur sprettum. Aðdragandinn þarf að vera góður, niðurtakan mjúk og átakalaus og svo að láta skeiða, helst hratt. Spennustigið verður svo að vera rétt svo maður nái líka að hægja fallega niður. Hrafnhetta hentar vel í gæðingaskeið því hún er algjör gæðingur.“

Védísi hefur gengið vel á mótinu til þessa. „Ég er mjög sátt við árangur minn á mótinu til þessa. Nú er bara að halda áfram að einbeita sér og fara að undirbúa sig fyrir næstu greinar.“ Segir þessi flotta hestastelpa að lokum við blaðamann Eiðfaxa um leið og hann óskar henni til hamingju með árangurinn.

Hér fyrir neðan má sjá heildarniðurstöðu í gæðingaskeiði. Kristján Árni Birgisson nældi sér í silfur á Máney frá Kanastöðum með 7,13 í einkunn og Sigurður Baldur Ríkharðsson hlaut brons á Hrafnkötlu frá Ólafsbergi með 7,08 í einkunn.