Þrír stóðhestar náð afkvæmafjölda til heiðursverðlauna

Í dag fara fram kynbótasýningar á þremur stöðum á landinu þ.e. á Rangárbökkum, Selfossi og Hólum auk þess fer fram yfirlit í Spretti.

Nú þegar hafa þrír stóðhestar náð tilskildum fjölda afkvæma til heiðursverðlauna á komandi Landsmóti. Það eru þeir Álfaklettur frá Syðri-Gegnishólum, Hringur frá Gunnarsstöðum og Skaginn frá Skipaskaga.

Til að stóðhestur hljóti heiðursverðlaun fyrir afkvæmi verður hann að uppfylla tvö skilyrði; 118 stig í kynbótamati og 50 dæmd afkvæmi. Í framhaldi af því að hross hljóta nú tvær aðaleinkunnir, með og án skeiðs, eru stóðhestum sem hljóta 118 stig eða meira í aðaleinkunn kynbótamats án skeiðs nú líka veitt afkvæmaverðlaun. Áfram verður þó miðað við aðaleinkunn kynbótamatsins þegar hestum er raðað í verðlaunasæti á stórmótum.

Nýtt kynbótamat hrossa verður reiknað í næstu viku að loknum kynbótadómum á Íslandi og þá kemur endanlega í ljós hver þessara farsælu kynbótahesta hlýtur efsta sætið og hinn sögufræga Sleipnisbikar sem veittur er af Bændasamtökum Íslands.