Tímavélin – Afastrákurinn kominn með taktana aðeins þriggja ára

Tímavélin stoppar að þessu sinni á árinu 1995. Í 2. tölublaði Eiðfaxa það ár er skemmtilegt viðtal við leikarann, hagyrðinginn og hestamanninn Flosa Ólafsson. Þar ræðir hann um sína hestamennsku og sveitastörfin á Stóra-Aðalbergi í Reykholtsdal í Borgarfirði, hvar hann hafði þá búið um sex ára skeið með konu sinni Lilju Margeirsdóttur.

Í lok viðtalsins segir Flosi meðal annars: „Ekkert er eins gaman og að leggja á og halda til fjalla, vel ríðandi í góðum og glöðum félagsskap með sveitungum sínum eða sínum nánustu og yfirleitt fólki sem manni þykir vænt um. Sonur okkar, tengdadóttir og þeirra börn eru á kafi í hestamennsku. Og þó nafni minn Flosi sé ekki nema þriggja ára sé ég ekki betur en hann sé kominn með taktana.“

Flosi eldri sá því augljóslega hvað framtíðin bjó í skauti sér fyrir barnabarnið, en fyrir þá sem ekki þekkja, þá er þriggja ára guttinn frá 1995 alnafni afa síns, Flosi Ólafsson tamningamaður og stórknapi.