Töltveisla í 1.deild Hringdu í hestaíþróttum

Keppni í tölti T1 fer fram í 1.deild Hringdu í hestaíþróttum í kvöld í reiðhöll Sörla í Hafnarfirði. Það er Útfararstofa Íslands sem býður gestum frítt í höllina. Hlaðborð frá Flóra veisluþjónustu með öllu tilheyrandi verður í boði á sanngjörnu verði. Mótið er sýnt í beinni útsendingu á EiðfaxaTV. Keppni hefst klukkan 19:00.

Gæðingaval

Þegar rýnt er í ráslista kvöldsins má sjá marga knapa og hesta sem góðum árangri hafa náð í tölti auk spennandi hrossa sem hlotið hafa góðan kynbótadóm eða gert það gott í öðrum keppnisgreinum.

Að öðrum ólöstuðum verður fyrstan að nefna Vísi frá Kagaðarhóli og Pál Braga Hólmarsson. Þeir hafa verið á meðal fremstu töltpara landsins um nokkurra ára skeið og teljast sigurstranglegir fyrir kvöldið. Hermann Arason og Náttrún Ýr frá Herríðarhóli hafa náð góðum árangri í þessari grein og hlutu m.a. 7,33 í forkeppni á Reykjavíkurmeistaramóti í fyrra auk þess að verða í 2.sæti í þessari grein í 1.deildinni í fyrra. Ólöf Rún Guðmundsdóttir og Hringhenda frá Geirlandi náðu þá líka góðum árangri á síðast keppnistímabili og hlutu hæst 7,30 í forkeppni.  Helgi Þór Guðjónsson mætir á Þresti frá Kolsholti sem hefur gert það gott í töltkeppni og m.a. hlaut hann 7,27 í einkunn á síðasta ári. Sól frá Söðulsholti og Siguroddur Pétursson voru í úrslitum í tölti 1.deildar í fyrra og hafa mikla keppnisreynslu.

Ráslisti kvöldsins

Stutt á milli í einstaklingskeppni

Það er mjótt á munum í einstaklingskeppninni og stefnir í spennandi keppni allt fram á lokastundu. Þær Katla Sif Snorradóttir og Lea Schell eru jafnar í efsta sætinu sem stendur með 23,5 stig. Katla mætir til leiks í töltið á Sæmari frá Stafholti sem hún hefur gert góða hluti á. Það sama má segja um Leu sem mætir á honum fjölhæfa Húna frá Efra-Hvoli. Þriðja er svo Þórdís Inga Pálsdóttir með 22 stig en hún keppir í töltinu á hinum fasmikla Móses frá Flugumýri II.

1.-2 Katla Sif Snorradóttir 23,5
1.-2 Lea Schell 23,5
3. Þórdís Inga Pálsdóttir 22
4.-5. Páll Bragi Hólmarsson 17
4.-5. Hlynur Guðmundsson 17
6. Benedikt Ólafsson 16
7. Ólafur Þórisson 12,5
8. Ólöf Rún Guðmundsdóttir 12
9. Birna Olivia Ödqvist 12
10. Fredrica Fagerlund 9

Lið Fornusanda leiðir með töluverðu forskoti í liðakeppnini með 231 stig en þau hafa gert það stórgott í öllum keppnisgreinum hingað til. Í öðru sæti er svo lið Hrímnis með 184 stig og í því þriðja er lið Sportfáka með 163,5 stig. Það stefnir því í baráttu á öllum vígstöðum bæði í töltkeppninni sjálfri og í einstaklings og liðakeppni. Hestaáhugafólk er því hvatt til þess að mæta í Hafnarfjörð í kvöld en fyrir þá sem ekki þangað komast að fylgjast með í beinni útsendingu á EiðfaxaTV.

1. Fornusandar 213
2. Hrímnir 184
3. Sprotfákar 163,5
4. Vindás/Stóðhestaval 143
5. Kidka/Hestakoti 132
6. HorseDay 122
7. Hringdu 114
8. Tommy Hilfiger 110,5

Hér að neðan má sjá þegar þeir Arnar Bjarki Sigurðarson og Sverrir Einarsson drógu í rásröð og veltu hestakosti fyrir sér.