Yfirdómnefnd þarf að taka á þeim málum sem upp koma á mótsstað

Í gær birtist á vef Eiðfaxa grein eftir Jón Þorberg Steindórsson er fjallar um úrskurð aganefndar í málum  er tengjast Metamóti og Skeiðleikum 2, greinina má lesa með því að smella hér.

Blaðamaður Eiðfaxa hafði í framhaldinu samband við Atla Má Ingólfsson sem var settur formaður Aganefndar í þessum málum. Hér fyrir neðan má sjá svör hans og spurningar Eiðfaxa.

Hvernig má það vera að aganefnd hafi ekki heimild til þess að fella árangur keppanda úr gildi sem svo greinilega er á skjön við lög og reglur LH?
Heimildir Aganefndar til að fella árangur keppenda úr gildi verða að eiga sér stoð í lögum og reglum LH. Þegar svo háttar til að mál berst Aganefnd löngu eftir að kærufrestir vegna móta eru liðnir eru ekki til staðar heimildir í Lögum og reglum LH til að taka á þeim málum ef þau eru ekki sérstaklega kærð til Aganefnar af yfirdómnefnd móta og á þeim tekið þar. Þessi niðurstaða er staðfest í málum Dómstóls ÍSÍ í nr. 9/2020 og einnig 10/2020. Hins vegar er skýrt og staðfest í dómi nr. 9/2020 að vald yfirdómnefndar nær til þess að fella niður árangur ef aðilar gerast brotlegir við lög og reglur LH og er ekki að finna tímamörk þessarar heimildar í lögum og reglum LH. Það var niðurstaða Aganefndar í þeim málum sem fjallað er um í málum nr. 1/2021 og 2/2021, að fyrst yfirdómnefndir nýttu ekki vald sitt m.a. að fella niður árangur sem náðist gæti Aganefnd ekki án skýrra heimilda í lögum gert það að fyrra bragði enda tímafrestir liðnir. Aganefnd hefði hins vegar getað fjallað um málið ef yfirdómnefndir mótanna hefðu tekið á því, eins og heimildir þeirra segja til um í lögum og reglum LH.  Aganefnd taldi sig einfaldlega bundna af niðurstöðu fordæma dómstóls ÍSÍ vegna mála Aganefndar nr. 1/2020 og 2/2020 (Dómstóll ÍSÍ mál nr. 9 og 19) og án skýrra lagaheimilda gæti hún ekki tekið sér vald sem lög og reglur LH mæla ekki skýrt fyrir um að nefndin hafi. En áréttað er að skýr heimild var og er fyrir yfirdómnefndir til að koma að viðurlögum í þessum málum.

Varðandi fyrri mál sem nefnd eru í grein Jóns Þorbergs, hvernig eru þau frábrugðin hvort öðru og þeim brotum sem aganefnd úrskurðaði í á dögunum?

Það er rétt að halda því til haga að nýjir dómar frá dómstóli ÍSÍ sem áður var vitnað til gefa fordæmi í þeim málum sem á eftir fara og verður að skoða nýja úrskurði Aganefndar í því ljósi. Verður að horfa til þess að úrskurðir sem falla eftir þessa dóma verða að taka mið af dómunum. Að mati Aganefndar er e.t.v. ekki rétt að fjalla um gömul mál en af því að vísað er sérstaklega til mála nr. 2/2005 og 1/2007 og talað um að þar sé með ólíkum hætti tekið á keppendum, þá virðist munurinn liggja í því að á öðru mótinu var fjallað um málið og agabrot kært til nefndarinnar en á hinu mótinu var brotið ekki kært til nefndarinnar og einungis skráð í athugaemdir um mótið.

Hvert er hlutverk aganefndar ef hún getur ekki gripið inn í svo greinileg mannleg mistök sem áttu sér stað á Metamóti og Skeiðleikum 2?

Það er hlutverk yfirdómnefndar mótanna að leiðrétta rangar mótsskýrslur eða laga þær eftir að frestir eru liðnir til að kæra mál á mótsstað. Hlutverk Aganefndar hefur í raun ekkert breyst eftir dóma Dómstóls ÍSÍ. Hlutverkið er enn að fara yfir mótsskýrslur og úrskurða vegna brota á lögum og reglum LH sem tilkynnt eru og kærð til nefndarinnar og úrskurða í málum vegna agabrota sem eiga sér stað. Það sem hins vegar liggur betur fyrir núna eftir dóma frá Dómstóli ÍSÍ, er að þegar um brot er að ræða sem ekki er fjallað um af yfirdómnefnd eða er kært innan lögmæltra fresta getur Aganefnd ekki, án breytinga á lögum og reglum LH fjallað um þau mál sjálfstætt eða eftir tilvísun frá t.d. stjórn LH og beitt viðurlögum, nema yfirdómnefnd móta hafi tekið þau til skoðunar og beitt sínum heimildum. Heimildin er hjá yfirdómnefnd samkvæmt nýjum dómum frá dómstóli ÍSÍ, þegar tímafrestir eru liðnir.

Almennt má segja um þessi mál að það skiptir máli að yfirdómnefnd móta sé vel skipuð og að hún þekki hlutverk sitt og valdsvið. Hún treysti sér til að taka á þeim málum sem koma upp og halli ekki á Jón eða Sr. Jón í þeim efnum. Keppendur eða starfsmenn sem telja á sér brotið eiga að kæra atvik á mótinu til yfirdómnefnda. Stundum er það þannig að ef ekkert er að gert innan þess tíma sem reglurnar marka þá geta hlutir gerst sem erfitt er að taka á síðar. Einhver rammi verður ávallt að vera utan um mótin og það er því mikilvægt að atvik komi strax til skoðunar hjá yfirdómnefnd móta og það sé tekið á þeim á mótsstað og atvikinu síðan vísað til Aganefndar í mótsskýrslu að móti loknu, á meðan frestir til að kæra eru enn virkir.