Herkúles á þau afkvæmi sem hæsta einkunn hlutu fyrir sköpulag

Fyrr í vikunni var fjallað um þá stóðhesta sem áttu 4-9 afkvæmi sýnd í fullnaðardómi á árinu og meðaltal sköpulagseiginleika skoðað. Nú er röðin komin að þeim stóðhestum sem eiga 10 eða fleiri sýnd afkvæmi í ár og rýnum við í meðaltöl afkvæma þeirra í þeim eiginleikum sem dæmdir eru í sköpulagi.

Alls eru þeir hestar 37 talsins. Sá sem á flest afkvæmi með fullnaðardóm í ár er Spuni frá Vesturkoti en þau eru alls 51 talsins. Með lægstan meðalaldur afkvæma er Konsert frá Hofi en þau 37 afkvæmi hans sem komu fram í ár voru einungis 4,8 vetra að meðaltali.

Herkúles frá Ragnheiðarstöðum á 11 dæmd afkvæmi í fullnaðardómi í ár og er meðalaldur þeirra 5,6. ár.

Afkvæmi hans sem til dóms koma eru samkvæmt þessu fallega sköpuð en þau hafa hæsta meðaltalið í fjórum eiginleikum og auk þess með hæsta sköpulags einkunn að meðaltali. Eiginleikarnir eru höfuð (me.8,36), háls, herðar og bógar (me.8,73), samræmi (me.8,73) og prúðleiki (me.8,45). Þá er eins og áður segir meðaltal þeirra fyrir sköpulag hæst af þeim hestum sem eiga 10 fullnaðardæmd afkvæmi eða fleiri á árinu en þau hlutu 8,475 að meðaltali.

Þess má geta að Hylur frá Flagbjarnarholti, sonur Herkúlesar, setti í ár heimsmet þegar hann hlaut 9,09 fyrir sköpulag.

Afkvæmi Mjölnis frá Hlemmiskeiði hlutu að meðaltali hæstu einkunnina fyrir bak og lend en hún er 8,68, alls voru 11 afkvæmi hans sýnd í ár,  meðalaldur þeirra 7,5 ár.

Eldur frá Torfunesi á þau afkvæmi sem hæsta einkunn hlutu fyrir fótagerð meðaltal þeirra fyrir þann eiginileika er 8,50. Alls voru sýnd 19 afkvæmi hans í fullnaðardómi í ár og var meðalaldur þeirra. 6,6 ár.

Ölnir frá Akranesi og Viti frá Kagaðarhóli skila, samkvæmt þessari töflu, bestum réttleika. Afkvæmi þeirra fengu að meðaltali 8,00 fyrir þann eiginleika.

Lord frá Vatnsleysi átti þau afkvæmi sem hæst hlutu fyrir hófa að meðaltali, einkunn þeirra. 8,55. Hann átti alls 11 sýnd afkvæmi í ár og var meðalaldur þeirra 6,4 ár.

Hér fyrir neðan má sjá meðaltals einkunnir afkvæma þessarra stóðhesta í öllum eiginleikum dæmdum í sköpulagi.

Síðar meir munum við taka fyrir, hér á vefsíðu Eiðfaxa, hæfileikaeinkunnir afkvæma þessara stóðhest.