Laufskálaréttir framundan

Á laugardaginn 26. september nk. eru stóðréttir í Laufskálarétt í Skagafirði. Þetta er ein af vinsælustu stóðréttum landsins og er yfirleitt mikið fjör og gleði í Skagafirðinum þessa helgi.

Þeir sem hafa gaman að því að fylgjast með stóðinu koma niður eru hvattir til að vera komnir að Laufskálarétt kl 12. Réttarstörf hefjast svo upp úr kl 13 undir stjórn Bergs Gunnarssonar á Narfastöðum. Áætlað er að réttarstörf ljúki upp úr kl 15:30.

Opið hús á Varmalandi á föstudeginum

Líkt og síðustu ár verður opið hús á Varmalandi föstudaginn 25. september. frá kl. 13 – 17:00. Kynning á vatnsbrettaþjálfun og hross á öllum aldri til sýnis og sölu. Léttar veitingar og góður félagsskapur.

Menntaráðstefna FEIF og LH í vikunni

Það er nóg um að vera í Skagafirði dagana fyrir réttirnar en Menntaráðstefna FEIF og LH verður haldin í dagana 23.–25. september 2026. Ráðstefnan hefst eftir hádegi miðvikudaginn 23. og endar um hádegi föstudaginn 25. september. Meginþema ráðstefnunnar verður gangskiptingar og gangsetning ásamt hraðabreytingum.